AQSHda “Grin karta” va immigratsiya vizalari uchun tekshiruvlar kuchaytirildi — CBS News
AQSH Fuqarolik va immigratsiya xizmati xodimlariga kuchaytirilgan tekshiruvdan o‘tmagan har qanday arizani tasdiqlash taqiqlanadi.
AQSHda immigratsiya imtiyozlari uchun murojaat qiluvchilarga nisbatan xavfsizlik tekshiruvlari kuchaytirildi. Bu haqda CBS News ichki hujjatlarga tayanib xabar berdi.
Bu o‘zgarishlar amalga oshirilayotgan paytda ayrim ishlar ko‘rib chiqilishi vaqtincha to‘xtatilmoqda.
Hujjatlarga ko‘ra, o‘tgan hafta AQSH Fuqarolik va immigratsiya xizmati (USCIS) o‘z xodimlariga boshpana (asylum), “grin karta” (doimiy yashash huquqi) va AQSH fuqaroligi kabi immigratsiya imtiyozlari bo‘yicha ko‘rib chiqilayotgan arizalarni qaytadan kuchaytirilgan tekshiruvlar uchun Federal qidiruv byurosiga (FQB) ma’lumotlar bazasiga yuborish bo‘yicha ko‘rsatma bergan. Xodimlarga kengaytirilgan tekshiruvlardan o‘tmagan hech qanday arizani tasdiqlamaslik topshirilgan.
Ma’lum qilinishicha, USCIS avvaldan immigratsiya arizalarini milliy xavfsizlik va jamoat nuqtayi nuqtayi nazaridan tekshirish uchun FQB bazalaridan foydalanib kelgan. Biroq yangi hujjatlar bu tekshiruvlar kuchaytirilishiga FQB tomonidan jinoyatlar tarixi ma’lumotlar bazasiga kengroq kirish imkoniyati berilishi sabab bo‘lganini ko‘rsatadi. Bu qaror fevral oyida Tramp tomonidan imzolangan farmon doirasida qabul qilingan.
Mazkur farmonga muvofiq, Adliya vazirligi USCIS ga jinoyatlar tarixi ma’lumotlar bazasiga “qonun ruxsat bergan eng yuqori darajada” kirish imkoniyatini ta’minlashi kerak.
AQSh Prezidenti farmonida ta’kidlanishicha, “bunday jinoyatchilar qatoriga AQSH immigratsiya qonunlarini buzgan holda mamlakatga kirgan yoki qolgan, yoxud boshqa jinoiy qonunbuzarliklar sodir etishga urinayotgan xorijiy fuqarolar kirishi mumkin”.
Kuchaytirilgan tekshiruvlar barmoq izlari topshirilishi talab etiladigan arizalarga, jumladan “grin karta” va naturalizatsiya (fuqarolik olish) jarayonlariga tatbiq etiladi. Shuningdek, AQSH fuqarolari yoki “grin karta” egalari tomonidan yaqin qarindoshlar yoki nikohlanish niyatidagi shaxslar uchun berilgan kafolat arizalari ham mazkur tekshiruvlarga tortiladi.
USCIS xodimlariga agar ish bo‘yicha FQB ma’lumotlari-27-apreldan oldin olingan bo‘lsa, barmoq izlari asosidagi tekshiruvlarni qayta yuborish topshirilgan. Agar arizani rad etish rejalashtirilgan bo‘lsa, qayta yuborish talab etilmaydi.
Yangi choralar Tramp ma’muriyatining immigratsiya imtiyozlari uchun murojaat qiluvchilarni yanada qat’iy tekshirish va AQSH immigratsiya tizimiga kirishni cheklashga qaratilgan siyosati doirasidagi navbatdagi qadam sifatida baholanmoqda.
Tramp yana hokimiyatga qaytganidan so‘ng USCIS immigratsiya arizalarini yanada chuqur tekshirishga qaratilgan qator siyosatlarni joriy qildi. Jumladan, arizachilarning ijtimoiy tarmoqlardagi “amerikaga qarshi” qarashlari yoki faoliyati ham tekshirila boshlangan.
Shuningdek, ikkinchi Tramp ma’muriyati ko‘plab immigratsiya ishlarini ko‘rib chiqishni sekinlashtirgan yoki to‘liq to‘xtatgan. Xususan, USCIS tomonidan ko‘rib chiqiladigan barcha boshpana ishlariga vaqtincha to‘xtam qo‘yilgan, shuningdek prezident farmonida ko‘rsatilgan 39 davlat fuqarolari uchun qonuniy immigratsiya arizalari qabul qilinishi ham to‘xtatilgan. Bu cheklovlar “travel ban” nomi bilan ma’lum.
