Energetika vazirining Otabek Bakirovning tanqidiy postlari yuzasidan shikoyati qayta ko‘rib chiqilmoqda
Vazir iqtisodchi ustidan avvalgi shikoyati bo‘yicha jinoyat ishi qo‘zg‘atish rad etilganidan so‘ng, IIOga yana murojaat qilgan.
Energetika vaziri Jo‘rabek Mirzamahmudov tomonidan iqtisodchi Otabek Bakirovga qarshi Toshkent shahar IIBBga berilgan navbatdagi shikoyat yuzasidan ish qayta ko‘rib chiqilmoqda. Bu haqda iqtisodchi Telegram-kanalida ma’lum qildi.
Ma’lum qilinishicha, vazir avvalgi murojaati bo‘yicha jinoyat ishi qo‘zg‘atish rad etilganidan so‘ng, 2024-yil 26-dekabrda “bakiroo” Telegram kanalida e’lon qilingan bir nechta postlarga huquqiy baho berish va chora ko‘rishni so‘rab ichki ishlar organlariga yana murojaat qilgan.
Ushbu holat bo‘yicha qariyb 14 oy o‘tgach, 2026-yil 23-yanvarda Toshkent shahar IIBB jinoyat ishi qo‘zg‘atishni rad etish haqida qaror qabul qilgan.
Biroq, 2026-yil 25-mart kuni Toshkent shahar prokuraturasi rad etish qarorini bekor qilgani ma’lum bo‘ldi. Hozirda ish Yashnobod tuman IIBga o‘tkazilgan va qayta ko‘rib chiqilmoqda.
Iqtisodchiga ko‘ra, shikoyat 2024-yil dekabr oyida metan zapravkalarida gaz mavjudligi va navbatlar haqida ma’lumot berishi aytilgan Avto24 ilovasiga bildirilgan e’tirozlar, shuningdek, Toshkent tumanida “rejaga chiqish” maqsadida gaz va elektr ta’minotining uzilishlari haqidagi chiqishlar bilan bog‘liq.
“Qizig‘i, shikoyat va qayta ochilgan ish yana qariyb 1,5-yil avvalgi chiqishlar bilan bog‘liq va o‘zgarishsiz jihati shundaki, mazkur post yozilayotgan kunda ham svet uch marta, qariyb 4 soatga o‘chdi”, deb yozdi Bakirov.
