"Sho‘rtan neft va gaz qazib chiqarish boshqarmasi"ga 16 ta majburiy ko‘rsatma berildi
Qashqadaryodagi korxonada ekologik talablar buzilgani aniqlanib, ish sudga yuborildi.
Ekologiya va iqlim o‘zgarishi milliy qo‘mitasi Davlat ekologik nazorat inspeksiyasi (Ekopolitsiya) tomonidan ekologik qonunchilik talablari ijrosini ta’minlash hamda sanoat korxonalarining atrof-muhitga ta’sirini kamaytirish maqsadida Qashqadaryo viloyatida navbatdagi tekshiruv tadbirlari o‘tkazildi.
O‘tkazilgan tadbirlar jarayonida “Sho‘rtan neft va gaz qazib chiqarish boshqarmasi” atrof-muhitga muntazam salbiy ta’sir ko‘rsatayotganligi, jumladan, atmosfera havosini muhofaza qilish talablariga rioya etilmasligi, chang-gaz tozalash uskunalari, oqova suvlarni tozalash inshootlari ekologik talablarga javob bermasligi va yana bir qator ekologik qonunchilik talablari qat’iy buzilganligi aniqlangan.
Mazkur holatlar yuzasidan korxonaga nisbatan qo‘shimcha kompensatsiya to‘lovlari belgilangan. Shuningdek, 16 banddan iborat bajarilishi majburiy bo‘lgan ko‘rsatmalar berilgan.
To‘plangan hujjatlar yakuniy baho berish va qaror chiqarish maqsadida sud organlariga yuborilgan.
