Toshkentda bankdan qarzdor fuqaro mashinasidan ayrildi
Maʼlum bo‘lishicha, fuqaro bankdan avtokredit olib, uni vaqtida to‘lamay kelgan.
Majburiy ijro byurosining Mirzo Ulug‘bek tuman bo‘limi ish yurituvida fuqarolik ishlari bo‘yicha Shayxontohur tumanlararo sudining ijro varaqasiga asosan qarzdor fuqarodan undiruvchi bank foydasiga jami 168 786 251 so‘m qarz undirish hamda undiruvni JETOUR rusumli avtotransport vositasiga qaratish belgilangan ijro hujjati mavjud.
Mazkur holatning kelib chiqish sababi shundaki, fuqaro ushbu avtotransport vositasini bankdan avtokredit asosida xarid qilgan bo‘lsa-da, kredit to‘lovlarini o‘z vaqtida amalga oshirmagan. Natijada qarzdorlik yuzaga kelib, sud qaroriga asosan ijro harakatlari boshlangan.
Ijro hujjati ijrosini taʼminlash maqsadida davlat ijrochisi tomonidan qarzdorga tegishli JETOUR rusumli avtomashina qidiruvga berilgan. Olib borilgan chora-tadbirlar natijasida ushbu transport vositasi yo‘l harakati jarayonida aniqlanib, belgilangan tartibda ushlab qolingan va 2026 yil 22 aprel kuni xatlanib, jarima maydoniga joylashtirilgan.
Shu bilan birga, o‘rganishlar davomida aniqlanishicha, qarzdor tomonidan 2025 yildan buyon yo‘l harakati qoidalarini buzganlik uchun belgilangan maʼmuriy jarimalar ham o‘z vaqtida to‘lanmagan. Bu holat ham fuqaroning mavjud majburiyatlariga yetarli darajada eʼtibor qaratmaganini ko‘rsatadi.
Hozirgi kunda davlat ijrochisi tomonidan ushbu avtotransport vositasini qonunchilikda belgilangan tartibda “auksion savdolari”ga chiqarish orqali qarzdorlikni undirish choralari ko‘rilmoqda.
Mazkur holat barcha fuqarolar uchun muhim xulosa bo‘lib xizmat qiladi: kredit va boshqa moliyaviy majburiyatlarni o‘z vaqtida bajarmaslik nafaqat qarzdorlikka, balki mulkni yo‘qotishga ham olib kelishi mumkin. Shuningdek, mayda deb qaralgan jarimalarni ham o‘z vaqtida to‘lab borish kelgusida katta muammolarning oldini oladi.
