Toshkentda MIB xodimi dostavkachi rolini o‘ynab, qarzdor otani qo‘lga tushirdi
Erkak 3 yil davomida aliment to‘lamay, MIB xodimlaridan yashirinib kelgan.
Majburiy ijro byurosining Olmazor tuman bo‘limi ish yurituvida FIB Shayxontohur tumanlararo sudining 23.02.2023 yildagi sud buyrug‘iga asosan qarzdor I.Q.dan undiruvchi X.Q. foydasiga 2 nafar voyaga yetmagan farzandlari uchun ish haqining 1/3 qismi miqdorida aliment undirish to‘g‘risidagi ijro hujjati mavjud.
Ijro hujjatiga ko‘ra, 24.02.2023 yildan 27.04.2026 yilga qadar jami 36 000 000 so‘m aliment qarzdorligi to‘plangan. Ammo qarzdor ota o‘z farzandlari oldidagi burchini bajarish o‘rniga, aliment to‘lashdan bo‘yin tovlab, uzoq vaqt davomida yashirinib yurdi. Shu sababli 2026 yil yanvar oyida unga nisbatan qidiruv eʼlon qilindi.
Shunda davlat ijrochilari oddiy izlash bilan cheklanib qolmadi. Qarzdor yashab turgan xonadonga “ovqat yetkazib beruvchi” sifatida kirib borilganida, u buni oddiy xizmat deb o‘yladi. Ammo eshik ortida uni o‘z farzandlari haqini talab qilib kelgan davlat ijrochisi turgan edi. Shu joyning o‘zida qarzdor ushlandi.
Natijada javobgarlikka tortilishi mumkinligini anglagan qarzdor ota to‘plangan 36 000 000 so‘m aliment qarzdorligini to‘liq qopladi.
