Endi O‘zbekistonda “dom”larning balkoniga kir yoyish taqiqlanadi

O‘zbekistonda ko‘p kvartirali uylarni saqlash va ulardan foydalanish tartibiga oid yangi qoidalar tasdiqlandi. Bu haqda Adliya vazirligi ma’lum qildi.

 

Qayd etilishicha, “Ko‘p kvartirali uylarni saqlash va ulardan foydalanish qoidalari” (ro‘yxat raqami 3824, 2026-yil 29-aprel) davlat ro‘yxatidan o‘tkazilgan. Hujjatga muvofiq, endilikda ko‘p kvartirali uylarning kirish yo‘laklari va zinapoyalari haftasiga kamida bir marta tozalanishi shart.

 

Yangi tartibga ko‘ra, uylarni boshqarish organlari tomonidan har bir ko‘p kvartirali uy uchun umumiy texnik pasport yuritiladi. Shuningdek, ular yuk ko‘taruvchi konstruksiyalar, kuzatuv kameralari va domofonlarning soz holatini ta’minlash, zarur xo‘jalik anjomlari va materiallarni xarid qilish uchun mas’ul etib belgilandi.

 

Qoidalarga binoan, uylarning fasad qismi va umumiy foydalanish hududlarida reklamalar, afishalar hamda boshqa e’lonlarni o‘rnatish faqat mulkdorlar umumiy yig‘ilishi qarori asosida amalga oshiriladi. Shu bilan birga, turar joylarda shovqin darajasi belgilangan sanitariya me’yorlaridan oshmasligi kerak.

 

Hujjatda sanitariya talablari ham kuchaytirilgan. Jumladan, zaruratga ko‘ra, uylarning umumiy hududlari va tutash joylari boshqaruv organlari tomonidan deratizatsiya, dezinseksiya va dezinfeksiya qilinadi. Yerto‘lalarda avariya tufayli suv yoki oqova to‘planib qolsa, ular 24 soat ichida bartaraf etilishi lozim.

 

Bundan tashqari, lift xonalari haftasiga bir marta tozalanadi va lift uskunalari doimiy texnik monitoringdan o‘tkaziladi.

 

Qoidalarga ko‘ra, ko‘p kvartirali uylarda quyidagilar taqiqlanadi: 

 

•  yong‘in xavfini keltirib chiqaruvchi uskunalarni balkonlar va lodjiyalarga o‘rnatish; 
•  balkonlarda og‘ir buyumlarni saqlash; 
• balkonlar va lodjiyalarning fasad (tashqi) qismlarida kir, kiyim-kechak, gilam va boshqalarni osib qo‘yish (ichki qismi bundan mustasno); 
• uy hayvonlarini umumiy foydalanishdagi joylarda, zinapoyalarda, cherdaklarda, yerto‘lalarda, shuningdek umumiy foydalanishdagi oshxonalarda, balkonlarda va lodjiyalarda saqlash; 
• kirish yo‘laklarining zinapoya maydonlarida va zinapoyalarning ostida yonuvchi materiallarni saqlash; 
• umumiy issiqlik parametrlariga ta’sir ko‘rsatuvchi qayta rejalashtirish (rekonstruksiya) ishlarini amalga oshirish, qo‘shimcha isitish yuzalariga (isitilmaydigan yuzalar) issiqlik uskunalarini o‘rnatish, shuningdek, umumiy mulk tarkibiga kiruvchi issiqlik tizimlariga o‘zgartirish kiritish. 

 

Shuningdek, avtotransport vositalarini ko‘p kvartirali uylar va unga tutash yer uchastkalaridagi gazonlar usti, xiyobonlar, bolalar maydonchalari, trotuarlarga, kirish yo‘laklari qarshisiga qo‘yish taqiqlanadi.