Jahon shaharlar forumi WUF13 joriy yilda Bokuda o‘tkaziladi

2026-yil 17–22-may kunlari Ozarbayjon poytaxti Boku shahrida Birlashgan Millatlar Tashkilotining Jahon shaharlar forumi — WUF13 bo‘lib o‘tadi. Mazkur nufuzli tadbir dunyodagi eng yirik global platformalardan biri bo‘lib, shaharlarda barqaror rivojlanish va zamonaviy urbanizatsiya masalalariga bag‘ishlangan.

 

Forum BMTning Aholi punktlari bo‘yicha dasturi (UN-Habitat) va Ozarbayjon hukumati hamkorligida tashkil etilib, unda davlat tuzilmalari, xalqaro tashkilotlar, ekspertlar hamjamiyati hamda ommaviy axborot vositalari vakillari ishtirok etadi.

 

Jahon shaharlar forumi 2001-yilda BMT tomonidan global urbanizatsiya jarayonlari va uning jamiyat, iqtisodiyot hamda iqlim o‘zgarishiga ta’sirini o‘rganish maqsadida ta’sis etilgan. 2002-yildan boshlab har ikki yilda bir marotaba o‘tkazib kelinayotgan ushbu forum bugungi kunda eng ochiq va inklyuziv xalqaro muloqot platformalaridan biri sifatida e’tirof etiladi.

 

WUF13 doirasida shaharlarni barqaror rivojlantirish, tajriba almashish va innovatsion yechimlarni muhokama qilishga qaratilgan qator sessiyalar, davra suhbatlari, assambleyalar hamda “Urban Expo” ko‘rgazmasi tashkil etiladi. Ushbu ko‘rgazmada ishtirokchilar zamonaviy shaharsozlik, infratuzilma va “yashil” texnologiyalar sohasidagi ilg‘or yechimlar bilan tanishish imkoniga ega bo‘ladilar.

 

Forumning asosiy yo‘nalishlari quyidagilarni qamrab oladi: barqaror urbanizatsiya bo‘yicha jamoatchilik xabardorligini oshirish, siyosiy va amaliy tajribalar almashinuvi orqali bilimlarni boyitish hamda xalqaro hamkorlikni mustahkamlash.

 

Shuningdek, WUF13 doirasida “SDGs in Action”, “ONE UN”, “Urban Voices”, “Networking Events”, “WUF Academy”, “Urban Library” va “Urban Cinema” kabi maxsus tadbirlar ham tashkil etiladi.

 

Mutaxassislar fikricha, Boku shahrida o‘tkaziladigan WUF13 global urbanistik siyosat va kelajak shaharlarini rivojlantirish yo‘nalishida muhim xalqaro platforma bo‘lib xizmat qiladi.