O‘zbekistonda energetika tizimi tashkil topganiga 100 yil bo‘ldi

O‘zbekistonda zamonaviy energetika tizimi tashkil topganining 100 yilligi munosabati bilan soha xodimlariga tabrik yo‘llandi. Sana 1926-yil 1-may kuni Bo‘zsuv gidroelektr stansiyasi ishga tushirilgani bilan bog‘liq bo‘lib, aynan shu voqea mamlakat energetika tizimiga asos solgan tarixiy bosqich sifatida e’tirof etiladi.

 

Energetika vaziri Jo‘rabek Mirzamahmudov o‘z tabrigida qayd etishicha, dastlabki quvvati 2 megavatt bo‘lgan ushbu stansiya o‘z davrida sanoat va shahar infratuzilmasini elektr energiyasi bilan ta’minlashda muhim rol o‘ynagan.

 

Ta’kidlanishicha, o‘tgan bir asr davomida soha jadal rivojlanib, yangi elektr stansiyalari barpo etilib, mavjud tarmoqlar kengaytirildi hamda infratuzilma izchil modernizatsiya qilingan.

 

So‘nggi yillarda Shavkat Mirziyoyev rahbarligida sohaga qaratilgan e’tibor natijasida keng ko‘lamli ishlar amalga oshirilgan.

 

Shuningdek, 2021–2025-yillarda umumiy quvvati 5 582 megavatt bo‘lgan 15 ta quyosh va 5 ta shamol elektr stansiyalari foydalanishga topshirildi. Natijada, 2025-yilda quyosh va shamol manbalari orqali 10,5 milliard kVt⋅soat elektr energiyasi ishlab chiqarilgan bo‘lsa, yil yakuniga borib bu ko‘rsatkichni 15 milliard kVt⋅soatga yetkazish rejalashtirilgan.

 

Bundan tashqari, umumiy quvvati 8 ming megavattdan ortiq zamonaviy issiqlik elektr stansiyalari ishga tushirilgan, gidroelektr stansiyalar quvvati esa 2 400 megavattdan oshirilgan.

 

Qayd etilishicha, joriy yil yakuniga qadar yana yangi generatsiya quvvatlari, podstansiyalar va minglab kilometr elektr tarmoqlarini ishga tushirish rejalashtirilgan.

 

Vazir o‘z murojaatida energetika sohasi xodimlarining fidokorona mehnati va kasbiy mahorati kelgusida ham tarmoqning izchil rivojlanishini ta’minlashiga ishonch bildirgan.