Trampning o‘g‘illari Qozog‘istondagi konchilik loyihasiga sarmoya kiritdi — Financial Times
Skyline Builders orqali Kaz Resources’ning 20 foiz ulushi sotib olingan.
AQSh prezidenti Donald Trampning o‘g‘illari — Erik Tramp va Donald Tramp kichik Qozog‘istonda volfram qazib olish bilan bog‘liq loyihaga sarmoya kiritgani ma’lum bo‘ldi. Bu haqda Financial Times nashri manbalarga tayanib xabar berdi.
Nashr ma’lumotiga ko‘ra, 2025-yil avgust oyida aka-ukalar Skyline Builders qurilish guruhida ulush sotib olgan. Keyinchalik mazkur kompaniya konchilik sohasidagi Kaz Resources korxonasining 20 foiz ulushini qo‘lga kiritgan.
Shuningdek, 30-aprel kuni Cove Kaz Capital va Kaz Resources kompaniyalari Skyline bilan birlashish bo‘yicha kelishuvga erishgani bildirilgan. Yangi tuzilma kelgusida NASDAQ birjasida Kaz Resources brendi ostida savdoga chiqishi rejalashtirilmoqda.
Qayd etilishicha, birlashuv haqidagi rasmiy press-relizda Trampning o‘g‘illari nomi tilga olinmagan.
