Namanganda aliment to‘lamay yurgan ayol kafedan topildi
Maʼlum bo‘lishicha, u uzoq vaqt davomida davlat ijrochilaridan yashirinib yurgan.
Namangan viloyatida aliment to‘lashdan bo‘yin tovlab yurgan fuqaroni qidirish bo‘yicha olib borilgan chora-tadbirlar samara berdi. Byuroning Chortoq tuman bo‘limi tomonidan qidiruv eʼlon qilingan M.A. uzoq vaqt davomida davlat ijrochilaridan yashirinib yurgan.
Maʼlumotlarga ko‘ra, qarzdor fuqaro aliment to‘lovlarini o‘z vaqtida amalga oshirmagani sababli unga nisbatan qidiruv ishlari boshlangan. Shundan so‘ng masʼul idoralar tomonidan uning ehtimoliy harakatlanish yo‘nalishlari va yashash joylari o‘rganilib, tezkor-qidiruv tadbirlari izchil davom ettirilgan.
Olib borilgan izlanishlar natijasida u Namangan shahri Davlatobod tumanida joylashgan “Yashil bozor” atrofida ko‘ringani aniqlangan. Keyinchalik, ushbu hududdagi kafelardan birida bo‘lishi mumkinligi haqida maʼlumot kelib tushgan.
Boshqarma qidiruv inspektorlari tomonidan o‘tkazilgan tadbirda qarzdor ayol aynan shu kafe ichida topildi. U shu zahotiyoq davlat ijrochilariga topshirildi.
Hozirda ushbu holat yuzasidan qonunchilikka muvofiq tartibda choralar ko‘rilmoqda.
