Farg‘ona 90 dan ortiq xonadonni suv bosdi
Hozirda kuchli yog‘ingarchilik oqibatlari bartaraf etilmoqda.
Joriy yilning 1-may kuni soat 21:41 da “112” tizimi orqali Farg‘ona viloyatining Beshariq tumanida kuchli yog‘ingarchilik kuzatilgani hamda uning oqibatida tumanning “Vorux Dasht” va “Yangiqo‘rg‘on” mahalla fuqarolar yig‘inlaridagi ayrim ko‘chalarda 90 dan ortiq xonadon tomorqalariga yomg‘ir suvlari kirgani haqida xabar kelib tushgan. Bu haqda Favqulodda vaziyatlar vazirligi ma'lum qildi.
Ma’lumotga ko‘ra, voqea joyiga zudlik bilan Farg‘ona viloyati FVB, viloyat va tuman hokimligi hamda FVDT xizmatlari yetib borib, oqibatlarni bartaraf etish ishlarini boshlab yuborgan.
Hozirda hududda suvni chiqarish, zararlangan joylarni tozalash hamda aholi uchun xavfsiz sharoit yaratish bo‘yicha zarur choralar ko‘rilmoqda. Barcha tegishli kuch va vositalar safarbar etilgan.
Qayd etilishicha, hodisa oqibatida fuqarolar orasida tan jarohati olganlar yo‘q. Vaziyat mutasaddi tashkilotlar tomonidan to‘liq nazoratga olingan bo‘lib, oqibatlarni qisqa muddatda bartaraf etish rejalashtirilgan.
