O‘zbekistonda 1100 nafar xonanda 6,4 mlrd so‘m daromad qildi
Eng yuqori daromad 152 mln so‘mgacha yetgan.
O‘zbekistonda konsert-tomosha faoliyati bilan shug‘ullanuvchi ijodkorlar tomonidan daromadlarni deklaratsiya qilish jarayoni davom etmoqda. Soliq organlari ma’lumotiga ko‘ra, 2025-yil boshidan 2026-yil 1-may holatiga qadar 1100 nafar litsenziyaga ega xonanda o‘z daromadlari to‘g‘risida yillik deklaratsiya topshirgan.
Taqdim etilgan ma’lumotlarga ko‘ra, mazkur davrda jami 6 mlrd 478,5 mln so‘m daromad ko‘rsatilgan. Shundan 5 mlrd 91,9 mln so‘mi soliqqa tortiladigan daromad bo‘lib, 599,7 mln so‘m daromad solig‘i hisoblangan.
Xonandalar daromadlari reyting guruhlari kesimida quyidagicha taqsimlangan:
47 nafar ijodkor 1 mlrd 495,8 mln so‘m daromad ko‘rsatgan;
100 nafar san’atkor 901,4 mln so‘m daromad qayd etgan;
953 nafar ijodkor esa 4 mlrd 81,3 mln so‘m daromad bildirgan.
Shuningdek, deklaratsiyalar tahlili shuni ko‘rsatdiki, aksariyat ijodkorlar yiliga 10 mln so‘mgacha daromad qayd etgan. Ayrim yuqori toifadagi san’atkorlar esa 152 mln so‘mgacha daromad olganini bildirgan.
Qonunchilikka muvofiq, mazkur toifadagi soliq to‘lovchilar hisoblangan soliq summalarini 2026-yil 1-iyunga qadar to‘lashlari lozim.
