Prezident Shavkat Mirziyoyev Samarqandda Imom Buxoriy majmuasini ziyorat qildi

3-may kuni Oʻzbekiston Prezidenti Shavkat Mirziyoyev Samarqand shahriga tashrif buyurib, avvalo Imom Buxoriy majmuasini ziyorat qildi.

 

Ezgu anʼanalarga muvofiq, davlat rahbari buyuk muhaddis Imom Buxoriy maqbarasida Qurʼon tilovat qildirib, duo oʻqidi.

 

Qayd etilishicha, mazkur majmua Prezident tashabbusi bilan buyuk allomaning islom olamidagi yuksak mavqeiga munosib tarzda qayta bunyod etilgan. Ziyoratchilar uchun keng va zamonaviy sharoitlar yaratilgan.

 

Soʻnggi yillarda amalga oshirilgan keng koʻlamli bunyodkorlik ishlari natijasida majmuaning qabul qilish quvvati sezilarli darajada oshirildi. Ilgari kuniga 12 ming ziyoratchiga xizmat koʻrsatgan majmua bugungi kunda 65 ming nafargacha tashrif buyuruvchini qabul qilish imkoniyatiga ega.

 

Maʼlumotlarga koʻra, majmua qayta ochilganidan keyin bir oy ichida bu yerga 1 milliondan ortiq mahalliy va xorijiy ziyoratchilar tashrif buyurgan.

 

Tashrif davomida Prezident majmuaga keluvchilar uchun yanada qulay sharoitlar yaratish, infratuzilmani kengaytirish va ziyorat madaniyatini rivojlantirish yuzasidan qator topshiriqlar berdi.

 

Xususan, avtoturargohlarni kengaytirish, sayr hududlarini obodonlashtirish, dam olish uchun qulay muhit yaratish va bu boradagi ishlarni muntazam tahlil qilib borish zarurligi taʼkidlandi.

 

Shuningdek, majmuada imom-xatiblar malakasini oshirish tizimini yoʻlga qoʻyish, ziyoratchilar uchun yaratilgan sharoitlarni doimiy oʻrganib borish hamda qoʻshimcha choralar belgilash muhim ekani qayd etildi.

 

Davlat rahbari muqaddas qadamjolarni obod saqlash, ziyorat madaniyatini yuksaltirish va tarixiy merosga hurmat ruhini mustahkamlash yosh avlod tarbiyasida muhim ahamiyat kasb etishini alohida taʼkidladi.