“6 ta hokim qarori haqiqiy emas deb topildi”- hisobot

Toshkent shahar maʼmuriy sudi 2026 yilning birinchi choragi yakunlari bo‘yicha hisobot eʼlon qildi.

 

Qayd etilishicha, birinchi instansiyasi sudi 605 ta ariza ko‘rib chiqqan. Shundan 139 tasi qanoatlantirilgan, 351 tasi rad qilingan, 64 tasi ish yurituvidan tugatilgan hamda 51 tasi ko‘rmasdan qoldirilgan. Shu tariqa, ko‘rilgan ishlar 2025 yilning mos davriga nisbatan 15,7 foizga kamaygan.

 

Poytaxt maʼmuriy sudi raisi o‘rinbosari Akram Yusupovning so‘zlariga ko‘ra, mansabdorlarning xatti-harakatlarini qonunga xilof deb topish bilan bog‘liq ishlar nisbatan ko‘paygan. 

 

“Alohida qayd etiladiki, davlat soliq organlari, budjetdan tashqari pensiya jamg‘armalari, mahalliy hokimliklar, Majburiy ijro byurolari, Qurilish vazirligi va hududiy boshqarmalari mansabdor shaxslarining xatti-harakatlarini qonunga xilof deb topish, ular tomonidan chiqarilgan qarorlarni haqiqiy emas deb topish bilan bog‘liq ishlar nisbatan ko‘proq ko‘rilgan”- deydi Yusupov.

 

Xususan, davlat soliq organlari bilan bog‘liq 125 ta ish ko‘rib chiqilgan bo‘lsa, ularning 23 tasi fuqarolar foydasiga hal bo‘lgan va 15 ta soliq organlarining qarori noqununiy deb topilgan. Arizalarning 79 tasi esa qanoatlantirilmagan. 

 

Qolaversa, budjetdan tashqari pensiya jamg‘armalariga berilgan arizalar yuzasidan 55 ta ish ko‘rilgan va 23 tasi qanoatlantirilgan. 19 ta shikoyat rad etilgan.

 

“Mahalliy hokimliklarga nisbatan berilgan shikoyatlar yuzasidan 38 ta  ish ko‘rilgan. Shundan 12 tasi qanoatlantirilgan, Qolgani rad etilgan. Qanoatlantirilganlari natijasida, 6 ta hokim qarori haqiqiy emas, deb topilgan”- deydi Akram Yusupov.

 

Uning qayd etishicha, MIBga aloqador 118 ta ish ko‘rilgan bo‘lib, shundan 20 tasida fuqarolar yutib chiqqan. 71 ta ish qanoatlantirishdan rad qilingan.

 

“Shuningdek, chiqarilgan sud taʼsir choralarining 17 tasi MIB mansabdorlar shaxslarida aniqlangan qonun buzilish holatlariga to‘g‘ri keladi”- deydi u.