O‘zbekistonda 086-shakldagi tibbiy ma’lumotnomani endi onlayn olish mumkin
Mazkur hujjatni shakllantirish uchun avval fuqaro tibbiy ko‘rikdan o‘tgan bo‘lishi talab qilinadi.
O‘zbekistonda 086-shakldagi tibbiy ma’lumotnomani my.gov.uz portali orqali onlayn olish imkoniyati yaratildi. Bu haqda Yagona portalning Telegram-kanalida xabar berildi.
Qayd etilishicha, avval mazkur hujjatni olish uchun fuqarolar tibbiyot muassasalariga borib, navbat kutishga majbur bo‘lgan bo‘lsa, endilikda jarayon raqamlashtirildi. Xizmat abituriyentlar, ishga kiruvchilar, sportchilar, shuningdek ayrim ijtimoiy toifalarga mansub shaxslar uchun mo‘ljallangan.
Ma’lumotnomani olish uchun fuqaro my.gov.uz portaliga kirib, “Sog‘liqni saqlash” bo‘limi orqali tegishli xizmatni tanlashi va hujjatni yuklab olishi mumkin.
Ma’lumotnoma portalda shakllanishi uchun fuqaro avval tegishli tibbiyot muassasasida shifokorlar ko‘rigidan o‘tgan bo‘lishi lozim. Shifokorlar xulosasi bazaga kiritilgach, hujjatni masofadan turib olish imkoniyati yaratiladi.
Xabarga ko‘ra, mazkur xizmat bepul taqdim etiladi va qo‘shimcha hujjatlar talab qilinmaydi.
