Afgʻonistonda ayollarning diplomlarini sertifikatlash toʻxtatildi
Shuningdek oliy taʼlim tizimida ham yangi cheklovlar joriy etilgan.
Afgʻonistonda ayollarning akademik maʼlumotlarini tekshirish va sertifikatlash jarayoni toʻxtatilgani maʼlum qilindi. Bu haqda Afghanistan International nashri xabar berdi.
Qayd etilishicha, mamlakat Tashqi ishlar vazirligi tomonidan ayollarga tegishli taʼlim hujjatlarini, jumladan, xorijiy taʼlim muassasalarida olingan diplom va sertifikatlarni tasdiqlash amaliyoti bekor qilingan. Kobuldagi fuqarolarning bildirishicha, vazirlik hududida ularga “ayollar hujjatlarini tekshirish endi taqiqlangan” ekani ma’lum qilingan.
Shu bilan birga, oliy taʼlim tizimida ham kengroq cheklovlar joriy etilgan. Xususan, Afgʻoniston Oliy taʼlim vazirligi tomonidan davlat universitetlariga xorijiy tashkilotlar va oliy o‘quv yurtlaridan keladigan akademik maʼlumotlarni tasdiqlash bo‘yicha so‘rovlarga javob bermaslik haqida og‘zaki ko‘rsatma berilgani aytilmoqda. Bu ko‘rsatmalar erkak va ayol talabalarga birdek taalluqli bo‘lsa-da, ayollarga nisbatan qo‘llanilayotgan umumiy taʼlim cheklovlari fonida ularning imkoniyatlari yanada qisqarishi kutilmoqda.
Mazkur qaror natijasida afgʻon ayollarining xorijda oʻqishni davom ettirish, diplomlarini tasdiqlash yoki xalqaro tashkilotlarda ish topish imkoniyatlari sezilarli darajada cheklanadi. Shuningdek, bu holat Afgʻonistonning xorijiy universitetlar bilan akademik hamkorligi va xalqaro taʼlim almashinuvi jarayonlariga ham salbiy taʼsir koʻrsatishi mumkin.
Manbalarga ko‘ra, ushbu choralar keng jamoatchilik e’tiborini jalb qilmaslik maqsadida “jim va bosqichma-bosqich” tarzda joriy etilmoqda. Universitet ma’muriyatlariga xorijdan keladigan rasmiy so‘rovlarga javob bermaslik bo‘yicha ko‘rsatmalar berilgani esa amalda akademik hujjatlarning xalqaro miqyosda tan olinishi jarayonini to‘xtatib qo‘yadi.
Eslatib o‘tamiz, Afgʻonistonda avval ham qizlarning maktab taʼlimi oltinchi sinfdan keyin taqiqlangan, shuningdek, ayollarning ko‘plab sohalarda, jumladan xalqaro tashkilotlarda faoliyat yuritishiga ham jiddiy cheklovlar joriy etilgan edi.
