Germaniya O‘zbekistonga “yashil” iqtisodiyot uchun 9 mln yevro ajratadi
Loyihada hududiy rivojlanish bo‘yicha master-rejalar ishlab chiqish, “yashil” pilot loyihalarni amalga oshirish ham nazarda tutilgan.
O‘zbekistonda hududlarni barqaror rivojlantirish va “yashil” iqtisodiyotni rag‘batlantirish maqsadida Germaniya bilan yangi grant kelishuvi imzolandi. Bu haqda O‘zA xabar berdi.
Kelishuvga ko‘ra, hududiy rivojlanish bo‘yicha master-rejalar ishlab chiqish va “yashil” pilot loyihalarni amalga oshirish uchun 9 million yevro mablag‘ jalb etiladi.
O‘zbekiston Iqtisodiyot va moliya vazirligi hamda Germaniya xalqaro hamkorlik jamiyati (GIZ)ning O‘zbekistondagi vakolatxonasi ishtirokida o‘tkazilgan uchrashuvda tomonlar mazkur bitimga erishdi.
Muzokaralar davomida ilgari amalga oshirilgan loyihalar natijalari tahlil qilinib, kelgusidagi ustuvor yo‘nalishlar belgilab olindi.
Qayd etilishicha, avval ajratilgan grant mablag‘lari hisobidan 12 ta tuman uchun kompleks rivojlanish master-rejalari ishlab chiqilgan hamda 24 ta pilot loyiha ijobiy baholangan. Jumladan, Shahrisabz tumanida 500 gektar maydonda agroturizm majmuasi tashkil etildi, bir qator hududlarda kasbga o‘qitish markazlari ishga tushirilgan.
Shuningdek, intensiv baliqchilik loyihalari yo‘lga qo‘yilib, ijtimoiy obyektlarda energiya tejovchi texnologiyalar joriy etildi, IT va hunarmandchilik markazlari tashkil etildi. Ushbu yo‘nalishlarga jami 1,3 million yevro grant mablag‘lari yo‘naltirilgan.
Yangi kelishuvga muvofiq, 2026–2029-yillarda mazkur ishlar kengaytiriladi. Xususan, master-rejalarni ishlab chiqishda sun’iy intellekt va innovatsion tahlil usullaridan foydalanish, mavjud rejalar asosida “yashil” pilot loyihalarni ko‘paytirish rejalashtirilgan.
Vazirlik axborot xizmatiga ko‘ra, Baxmal, Boysun va So‘x tumanlarida ham yangi tashabbuslar amalga oshiriladi. Loyihalar samaradorligini oshirish maqsadida mahalliy va xorijiy ekspertlar jalb qilinib, mutaxassislar malakasini oshirishga qaratilgan o‘quv dasturlari, seminar va treninglar tashkil etilishi ko‘zda tutilgan.
