O‘zbekistonda “Faxriy” maqomi joriy etiladi
Mazkur maqomga ega shaxslar bir qator imtiyozlardan foydalanish huquqiga ega bo‘ladi.
Oliy Majlis Qonunchilik palatasida “Faxriylar to‘g‘risida”gi qonun loyihasi birinchi o‘qishda ko‘rib chiqildi va deputatlar tomonidan qabul qilindi.
Qonun loyihasi bilan faxriylar maqomi, ularning toifalari, shuningdek, soha va idoralarning vakolatlari aniq belgilanishi nazarda tutilmoqda.
Hujjatda faxriylarning huquqiy hamda ijtimoiy himoyasini kuchaytirish, ularga beriladigan imtiyoz va kafolatlarni tizimlashtirish ko‘zda tutilgan.
Loyihaga ko‘ra, muayyan soha, tarmoq yoki kasbda uzoq yillar davomida vijdonan va namunali mehnat qilgan, davlat hamda jamiyat e’tirofiga sazovor bo‘lgan fuqarolarga “faxriy” maqomi beriladi.
Mazkur maqomga ega shaxslar bir qator imtiyozlardan foydalanish huquqiga ega bo‘ladi. Xususan, ular sanatoriy-kurort va sog‘lomlashtirish muassasalarida bepul davolanish, uy-joy va kommunal xizmatlar uchun kompensatsiya to‘lovlari olish, shuningdek, soliq va pensiya tizimi doirasidagi imtiyozlardan foydalanish imkoniga ega bo‘ladi.
Shuningdek, faxriylarning ambulator davolanish jarayonida dori vositalari bilan imtiyozli ta’minlanishi, madaniyat va ko‘ngilochar muassasalar — teatrlar, sport inshootlari, muzeylar hamda moddiy madaniy meros obyektlaridan imtiyozli foydalanishi ham nazarda tutilmoqda.
Qonun loyihasida faxriylarni ijtimoiy qo‘llab-quvvatlash tizimini mustahkamlash, ularning huquq va kafolatlarini qonunchilik darajasida aniq belgilash ham asosiy maqsad sifatida qayd etilgan.
Muhokamalardan so‘ng, qonun loyihasi deputatlar tomonidan birinchi o‘qishda ma’qullandi.
