Oʻzbekistonda yer osti tunnellari qurish uchun jinoiy javobgarlik joriy etiladi
2016–2025-yillar davomida 12 ta noqonuniy chegaradan oʻtuvchi tunnel aniqlangan.
Oʻzbekistonda davlat chegarasi xavfsizligini mustahkamlash hamda noqonuniy faoliyatlarning oldini olish maqsadida yer osti tunnellari bilan bogʻliq jinoyatlar uchun javobgarlikni kuchaytirish rejalashtirilmoqda.
Maʼlum qilinishicha, soʻnggi yillarda davlat chegarasi orqali yashirin tunnellar qazish orqali tovar va boshqa moddiy boyliklarni noqonuniy olib oʻtish holatlari ortib bormoqda. Xususan, 2016–2025-yillar davomida 12 ta shunday tunnel aniqlangan. Fargʻona va Andijon viloyatlarida tunnellar orqali 30 milliard soʻmdan ortiq mahsulotlar noqonuniy ravishda olib kirilgani qayd etilgan.
Shu munosabat bilan Oliy Majlis Qonunchilik palatasida “Oʻzbekiston Respublikasining Jinoyat va Jinoyat-protsessual kodekslariga oʻzgartirish va qoʻshimchalar kiritish toʻgʻrisida”gi qonun loyihasi koʻrib chiqildi.
Loyihaga koʻra, davlat chegarasi orqali yer osti tunnellari yoki noqonuniy infratuzilmadan foydalangan holda bojxona qonunchiligini buzish ogʻirlashtiruvchi holat sifatida belgilanmoqda. Shuningdek, bunday tunnellar orqali noqonuniy kirish-chiqish yoki chegarani kesib oʻtish uchun ham javobgarlik kuchaytiriladi.
Bundan tashqari, noqonuniy tunnellarni qurish, ulardan foydalanish yoki ushbu faoliyatni moliyalashtirish uchun alohida jinoiy javobgarlik joriy etilishi taklif etilmoqda.
Qonun loyihasida yana bir muhim norma sifatida, agar shaxslar ixtiyoriy ravishda noqonuniy tunnellar haqida xabar bersa yoki jinoyatni fosh etishga koʻmaklashsa, ularni jinoiy javobgarlikdan ozod etish nazarda tutilgan.
Deputatlar ushbu tashabbus davlat chegarasini yanada mustahkamlash, noqonuniy faoliyatlarga barham berish va mamlakatda xavfsizlikni taʼminlashda muhim ahamiyatga ega ekanini taʼkidlab, qonun loyihasini maʼqulladilar.
