Qozog‘istonda “Kaztsink” zavodida portlash yuz berdi
Portlash oqibatida 2 kishi halok bo‘ldi, 5 kishi jarohatlandi.
Qozog‘istonning Ust-Kamenogorsk shahrida joylashgan “Kaztsink” metallurgiya majmuasida yuz bergan portlash oqibatida ikki ishchi halok bo‘ldi, yana besh kishi jarohat oldi. Bu haqda Tengrinews.kz xabar berdi.
Ma’lum qilinishicha, hodisa 5-may kuni tutun so‘rgichni tozalash ishlari olib borilayotgan vaqtda sodir bo‘lgan. Dastlabki ma’lumotlarga ko‘ra, qurilmada portlashga o‘xshash zarba yuz berib, uning ortidan yong‘in kelib chiqqan hamda konstruksiyalarning bir qismi qulagan.
Kompaniya bayonotiga ko‘ra, jabrlanganlarga zarur tibbiy yordam ko‘rsatilmoqda. Voqea joyida favqulodda xizmatlar ishlamoqda, oqibatlarni bartaraf etish ishlari davom etmoqda. Hodisa yuzasidan maxsus komissiya tuzilgan bo‘lib, uning sabablari va tafsilotlari tekshiruv yakunlariga ko‘ra aniqlanadi.
“Kaztsink” halok bo‘lganlarning yaqinlariga hamdardlik bildirib, jabrlanganlar va marhumlarning oilalariga moddiy hamda psixologik yordam ko‘rsatilishini ma’lum qildi.
Shuningdek, vakolatli organlar tomonidan atrof-muhitga ta’sir o‘rganilmoqda. Dastlabki xulosalarga ko‘ra, mahalliy miqyosda chang chiqishi qayd etilgan bo‘lib, ruxsat etilgan me’yorlardan oshish va xavfli moddalar ajralishi aniqlanmagan.
Favqulodda vaziyatlar vazirligi ma’lumotiga ko‘ra, hodisa joyidan to‘rt nafar jabrlanuvchi topilib, tibbiyot muassasalariga yetkazilgan. Qutqaruvchilar, shifokorlar va kinolog guruhlari jalb etilgan.
Hodisa tongda shahar aholisi orasida ham xavotir uyg‘otdi — osmon sari ko‘tarilgan quyuq tutun ijtimoiy tarmoqlarda keng tarqaldi.
Qozog‘iston bosh vaziri Oljas Bektenov mazkur holat yuzasidan tegishli vazirliklar va hududiy hokimlikka zarur topshiriqlar berilganini bildirib, vaziyat hukumat nazoratida ekanini ma’lum qildi.
