1-avgustdan sanoat va yadroviy xavfsizlik qoidabuzarliklari haqida xabar bergan fuqarolar mukofotlanadi

 

O‘zbekistonda sanoat, radiatsiya va yadroviy xavfsizlik qoidalariga rioya etilishini kuchaytirish hamda huquqbuzarliklarning oldini olishga qaratilgan yangi tartib joriy etilmoqda. Bu haqda Adliya vazirligi xabar berdi.

 

Hukumatning tegishli qaroriga muvofiq, 2026-yil 1-avgustdan boshlab xavfli ishlab chiqarish obyektlari va texnik qurilmalardan foydalanishda aniqlangan qoidabuzarliklar haqida foto va (yoki) video materiallar taqdim etgan fuqarolar rag‘batlantiriladi.

 

Belgilangan tartibga ko‘ra, taqdim etiladigan materiallarda huquqbuzarlikning mohiyati, sodir etilgan joy (geolokatsiya), sana va vaqt aniq aks etgan bo‘lishi lozim. Axborot tizimi orqali kelib tushgan materiallar hamda “E-ma‘muriy ish” uchun zarur maʼlumotlar to‘plami Qo‘mitaning hududiy boshqarmasi (bo‘limi) masʼul xodimi tomonidan 3 ish kuni mobaynida joyiga chiqqan holda ko‘rib chiqiladi.

 

O‘rganish natijasida aniqlangan huquqbuzarliklar yuzasidan ma’muriy ish qo‘zg‘atiladi hamda qonunchilikka muvofiq choralar ko‘riladi.

 

Shuningdek, huquqbuzarlik haqida asosli ma’lumot taqdim etgan shaxs undirilgan jarimaning Qo‘mitaga o‘tkazilgan qismining 20 foizi miqdorida pul mukofoti bilan rag‘batlantiriladi.