Italiya bosh vaziri sun’iy intellekt nishoniga aylandi
Rasmni tarqatgan foydalanuvchi Meloni “uyalishi kerak”ligi haqida izoh qoldirgan.
Italiya bosh vaziri Jorja Meloni internetda uning sun’iy intellekt yordamida yaratilgan soxta fotosurati tarqatilganini keskin qoraladi va bunday texnologiyalar siyosiy va shaxsiy hujum vositasiga aylanayotganidan ogohlantirdi. Bu haqda AP xabar berdi.
Mazkur tasvirda Meloni yotoqda, ichki kiyimda tasvirlangan bo‘lib, u ijtimoiy tarmoqlarda keng tarqalgan. Bosh vazir ushbu fotosuratni o‘zining Facebook sahifasida ulashib, uning qanday tarqalganiga e’tibor qaratdi. Unga ko‘ra, rasm “Roberto” ismli foydalanuvchi tomonidan tarqatilgan va postda Meloni “uyalishi kerak”ligi haqida izoh qoldirilgan.
Meloni fuqarolarni ijtimoiy tarmoqlarda tarqaladigan kontentga ehtiyotkorlik bilan yondashishga chaqirdi va uni tekshirmasdan tarqatmaslik zarurligini ta’kidladi.
“Deepfake — bu juda xavfli vosita, chunki u odamlarni aldashi, manipulyatsiya qilishi va istalgan shaxsni nishonga olishi mumkin. Men o‘zimni himoya qila olaman, biroq ko‘pchilik bunga qodir emas,” — dedi u Facebookdagi bayonotida.
Bosh vazir ushbu holat bo‘yicha huquq-tartibot organlariga murojaat qilish-qilmaslik masalasi hali ko‘rib chiqilayotganini bildirdi. Shu bilan birga, u ba’zi izohlarda hazil ohangida, soxta tasvir “uni yanada chiroyli ko‘rsatganini” ham qayd etdi.
“Biroq haqiqat shuki, odamlar endi hujum qilish va yolg‘on tarqatish uchun mutlaqo har qanday vositadan foydalanmoqda,” — deya qo‘shimcha qildi Meloni.
Bu Meloni bilan bog‘liq birinchi shunday holat emas. Joriy yil boshida ham Rimdagi bir diniy inshootda paydo bo‘lgan farishta haykali uning tashqi ko‘rinishiga o‘xshatilgani ijtimoiy tarmoqlarda keng muhokamaga sabab bo‘lgan edi.
O‘shanda ham bosh vazir vaziyatga hazil bilan munosabat bildirgan va o‘zini “farishtaga o‘xshatish noto‘g‘ri”ligini aytgan edi.
