Oliy sud yana 161 nafar qatag‘on qurbonini oqladi

 

Oliy sud tomonidan sovet davrida asossiz ayblovlar bilan javobgarlikka tortilgan yana 161 nafar fuqaro oqlandi. Bu haqda sud matbuot xizmati ma’lum qildi.

 

Qayd etilishicha, mazkur jarayon Shavkat Mirziyoyevning 2020-yil 8-oktabrdagi qatag‘on qurbonlari xotirasini abadiylashtirishga qaratilgan farmoyishi asosida izchil amalga oshirilmoqda.

 

Shu maqsadda tuzilgan respublika ishchi guruhi tomonidan arxiv hujjatlari chuqur o‘rganilib, tarixiy adolatni tiklash ishlari keng ko‘lamda olib borilmoqda. Mutaxassislarga vazirlik va idoralar arxivlaridan foydalanish imkoniyati yaratilgani ham ushbu jarayon samaradorligini oshirmoqda.

 

Ma’lum qilinishicha, so‘nggi yillarda amalga oshirilgan izchil ishlar natijasida ilgari reabilitatsiya qilinmagan 1 236 nafar qatag‘on qurboni oqlangan.

 

So‘nggi qarorga ko‘ra, 1920–1934-yillarda turli tuzilmalar — xususan, Farg‘ona maxsus bo‘limi hamda O‘rta Osiyo va Qozog‘iston birlashgan davlat siyosiy boshqarmasi huzuridagi “Uchlik” qarorlari asosida sudlangan shaxslarga oid jinoyat ishlari qayta ko‘rib chiqildi.

 

Ular bosmachilik harakatlariga yordam berish, qurolli guruhlar tuzish va sovet hokimiyatiga qarshi faoliyatda ayblangan edi. Mazkur ishlar qayta o‘rganilib, 2026-yil 6-may kuni o‘tkazilgan ochiq sud majlislarida Jinoyat-protsessual kodeksining tegishli moddalari asosida 8 ta jinoyat ishi bo‘yicha 161 nafar shaxsga nisbatan oqlov hukmi chiqarildi.