11-may kuni boshlangʻich sinf oʻquvchilariga darslar boʻlmaydi, faqat yuqori sinflar o’qiydi
Maktabgacha va maktab ta’limi vazirligi 11-maydagi ish tartibi bo‘yicha ma’lumot berdi.
Maktabgacha va maktab ta’limi vazirligi 11-may kuni umumta’lim maktablari hamda maktabgacha ta’lim tashkilotlari faoliyati yuzasidan ma’lumot berdi.
Qayd etilishicha, Prezident farmoniga muvofiq, 9-may — Xotira va qadrlash kuni besh kunlik ish haftasida ishlaydigan xodimlar uchun shanba kuniga to‘g‘ri kelgani sababli dam olish kuni 11-may — dushanbaga ko‘chirilgan.
Shunga ko‘ra, 11-may kuni umumta’lim maktablarida shu kunga belgilangan dars mashg‘ulotlari o‘tkaziladi. Bunda boshlang‘ich sinf o‘quvchilari bundan mustasno ekani ma’lum qilindi.
Vazirlik axborotiga ko‘ra, davlat maktabgacha ta’lim tashkilotlarida esa 11-may dam olish kuni hisoblanadi. Nodavlat ta’lim muassasalarida dam olish kunlari ichki tartib-qoidalarga muvofiq belgilanadi.
Eslatib o‘tamiz, Prezident farmoniga asosan:
9-may, shanba — odatiy dam olish kuni;
10-may, yakshanba — odatiy dam olish kuni;
11-may, dushanba — ko‘chirilgan dam olish kuni etib belgilangan.
Mazkur tartibga ko‘ra, haftasiga 5 kun ishlaydigan xodimlar ketma-ket 3 kun, 6 kun ishlaydiganlar esa ketma-ket 2 kun dam oladi.
Shuningdek, farmonga muvofiq, ish haftasining turidan qat’i nazar barcha xodimlar uchun 28 va 29-may qo‘shimcha dam olish kunlari etib belgilangan. Olti kunlik ish haftasida ishlaydigan xodimlar uchun esa 30-may kuni ham dam olish kuni bo‘ladi.
