Nyu-York sudi Jeffri Epshteynning so‘nggi xatini e’lon qildi

AQShning Nyu-Yorkdagi federal sudi moliyachi Jeffri Epshteyn tomonidan yozilgani aytilayotgan va “o‘z joniga qasd qilish xati” sifatida ta’riflanayotgan hujjatni ommaga e’lon qildi. Bu haqda Reuters xabar berdi.

 

Qo‘lyozma shaklidagi hujjatda, jumladan, “Xayrlashish vaqtini o‘zing tanlash imkoniga ega bo‘lish — bu bir imtiyoz” degan jumla keltirilgan.

 

Jeffri Epshteyn 2019-yil avgust oyida Manhattendagi qamoqxona kamerasida o‘lik holda topilgan edi. Rasmiylar uning o‘limini o‘z joniga qasd sifatida baholagan.

 

Sud hujjatlariga ko‘ra, ushbu yozuv Epshteynning sobiq kameradoshi, qotillikda ayblangan sobiq politsiyachi Nikolas Tartagliyone tomonidan topilgan. U Epshteyn bilan 2019-yil iyul oyida taxminan ikki hafta bir kamerada saqlangan.

 

AQSh okrug sudyasi Kennet Karas mazkur hujjat Tartagliyone ishi materiallariga aloqador bo‘lgani sababli oshkor etilishi mumkin degan qarorga kelgan. Hujjat The New York Times so‘roviga javoban e’lon qilingan.

 

Sudya qarorida hujjatni maxfiy saqlash uchun huquqiy asos mavjud emasligi qayd etilgan. Shu bilan birga, sud uning haqiqiyligi yoki saqlanish tarixi bo‘yicha baho bermagan.

 

Sariq bloknotga yozilgan matnda Epshteyn o‘ziga qo‘yilgan ayblovlar haqida yozib, “Mendan nima kutyapsiz — yig‘lab yuboraymi?! Yo‘q, bunga arzimaydi!” degan jumlalarni ham qoldirgani aytilmoqda.

 

Jeffri Epshteyn avval 2008-yilda Floridada voyaga yetmagan shaxsdan fohishalik xizmatlarini talab qilganlikda aybini tan olib, qisqa muddatli jazo olgan. 2019-yilda esa u yana hibsga olinib, voyaga yetmaganlarni jinsiy ekspluatatsiya qilish va yollash bilan bog‘liq ayblovlarga duch kelgan.

 

Mazkur yozuv Epshteyn 2019-yil iyulida kamerada bo‘ynida izlar bilan tirik holda topilgan voqeadan keyin paydo bo‘lgan. O‘sha holat keyinchalik “o‘z joniga qasd qilishga urinish” sifatida baholangan. Oradan ko‘p o‘tmay, 2019-yil 10-avgust kuni u kamerada o‘lik holda topilgan va o‘z joniga qasd qilgani rasmiy ravishda ma’lum qilingan.