Nyu-Yorkda o‘zbekistonlik ayolni o‘limiga sabab bo‘lgan haydovchi hibsga olindi
Mazkur ish bo‘yicha sud majlisi 18-mayga belgilangan.
Nyu-York shahrida o‘zbekistonlik ayolning o‘limiga sabab bo‘lgan yo‘l-transport hodisasi yuzasidan shahar transport departamenti xodimi hibsga olindi deb xabar beradi Slavic Sacramento.
Ma’lumotlarga ko‘ra, 49 yoshli Jonatan Adorno 10-mart kuni Kvins hududida sodir bo‘lgan avariyadan qariyb yetti hafta o‘tib, 28-aprel kuni qo‘lga olingan.
Tergov ma’lumotlariga ko‘ra, u samosval boshqarib ketayotib, chorrahada burilish vaqtida piyodalar yo‘lagidan o‘tayotgan 31 yoshli o‘zbekistonlik Nilufar Komilovani urib yuborgan. Hodisa oqibatida ayol og‘ir tan jarohatlari olib, voqea joyida vafot etgan.
Haydovchiga piyodaga yo‘l bermaslik va ehtiyotsizlik bilan harakatlanish bo‘yicha ayblovlar qo‘yilgan.
Qayd etilishicha, hodisadan so‘ng haydovchi voqea joyini tark etmagan. Mazkur ish yuzasidan Nyu-York avtomagistral patrul xizmatining yo‘l harakati tergov bo‘limi tomonidan surishtiruv ishlari davom ettirilmoqda.
Navbatdagi sud majlisi 18-may kuni Kvins jinoyat sudida bo‘lib o‘tishi rejalashtirilgan.
