Rossiyada 8 ta aeroportda parvozlarga vaqtinchalik cheklov joriy etildi
Vnukovo aeroportidan uchadigan ayrim reyslar bekor qilingan, samolyotlar esa muqobil aerodromlarga yo‘naltirilmoqda.
Vnukovo aeroporti va Rossiyaning yana yettita aeroportida parvozlarga vaqtinchalik cheklovlar joriy etildi.
Rossiya transport vazirligi ma’lum qilishicha, cheklovlar havo hududidagi vaziyat hamda parvozlar xavfsizligini ta'minlash maqsadida kiritilgan.
Hozirda Vnukovo aeroporti bilan bir qatorda Ivanovo, Kaluga, Perm, Sochi, Tambov, Cherepovets va Yaroslavl aeroportlarida ham reyslarga xizmat ko‘rsatish vaqtincha to‘xtatilgan.
Keyinchalik Rosaviatsiya Perm aeroporti uchun cheklovlar bekor qilinganini ma’lum qildi.
Ma’lumotlarga ko‘ra, Moskva aeroportlarida kamida 30 ta reys ikki soatdan ortiq vaqtga kechiktirilgan. Yo‘lovchilarga xizmat ko‘rsatish uchun qo‘shimcha xodimlar jalb etilgan bo‘lib, aeroport xizmatlari kuchaytirilgan rejimda faoliyat yuritmoqda.
Shuningdek, aviakompaniyalar cheklovlar sabab Vnukovo aeroportidan amalga oshirilishi rejalashtirilgan ayrim reyslarni bekor qilmoqda. Aeroportga yo‘l olgan ayrim samolyotlar esa boshqa muqobil aerodromlarga yo‘naltirilgan.
“Rosaviatsiya” ma’lumotiga ko‘ra, Vnukovo aeroportida Moskva vaqti bilan soat 01:41 dan boshlab samolyotlarning qo‘nishi va uchib ketishiga vaqtinchalik cheklovlar joriy etilgan.
Aeroport ma’muriyati kechiktirilgan reyslar yo‘lovchilariga Federal aviatsiya qoidalariga muvofiq xizmat ko‘rsatilayotganini, terminal hududida ichimlik suvi va dam olish uchun zarur sharoitlar yaratilganini bildirdi.
