AQShda firibgarlik qilgan “soxta shayxlar” qamaldi
Ogayo shtatida yashovchi aka-ukalar o‘zlarini Yaqin Sharq qirollik oilasi vakillari sifatida tanishtirib kelgan.
AQShning Ogayo shtatida yashovchi va o‘zlarini Yaqin Sharq qirollik oilasi vakillari sifatida tanishtirib kelgan ikki aka-uka 21 million dollarlik yirik firibgarlik sxemasi uchun uzoq muddatga qamaldi. Bu haqda The New York Post xabar berdi.
Sud hukmiga ko‘ra, Zubayr Al Zubayr 24 yilga, uning ukasi Muzzammil Al Zubayr esa 23 yilga ozodlikdan mahrum etilgan.
Tergov ma’lumotlariga ko‘ra, aka-ukalar 2020–2023-yillar davomida o‘zlarini nihoyatda boy va nufuzli shaxslar sifatida ko‘rsatib, bir necha firibgarlik sxemalarini amalga oshirgan. Ular Ogayo shtatining Sharqiy Klivlend shahri meri apparatining sobiq rahbari Maykl Smedli bilan hamkorlik qilgan. Smedli ham ushbu ish bo‘yicha 8 yildan ortiq muddatga qamalgan.
Sudda aytilishicha, Zubayr o‘zini BAA malikasi bilan turmush qurgan shaxs sifatida tanishtirgan, Muzzammil esa hech qanday professional tajribasiz o‘zini xedj-fond menejeri deb ko‘rsatgan.
Aka-ukalar dabdabali hayot tarzi orqali atrofdagilarda ishonch uyg‘otishga uringan. Ular Rolls-Royce avtomobillari, xususiy samolyotlar, qimmatbaho soatlar va luks avtomobillardan foydalangan. Shuningdek, ularning kolleksiyasida o‘nlab qurollar, jumladan oltin qoplamali AK-47 uslubidagi miltiq ham bo‘lgan.
Federal prokuraturaga ko‘ra, aka-ukalar turli sxemalar orqali bir necha jabrlanuvchilarning millionlab dollar mablag‘larini o‘zlashtirgan. Jumladan, Zubayrning BAA fuqarosi bo‘lgan sobiq sevgilisi 737 ming dollar yo‘qotgan.
Eng yirik epizodlardan birida esa ular xitoylik investorni qariyb 18 million dollarga aldagan. Aka-ukalar investorni sanoat majmuasiga egalik qilayotgani va u yerda kriptovalyuta biznesini yo‘lga qo‘yishiga ishontirgan.
Tergovchilar ta’kidlashicha, aka-ukalar Maykl Smedliga qimmat sovg‘alar, naqd pullar, restoranlar, VIP sport chiptalari va boshqa imtiyozlar orqali pora bergan. Evaziga u ularga rasmiy hujjatlar, politsiya guvohnomalari va davlat darajasidagi ko‘maklarni taqdim etgan.
Sud hakamlar hay’ati uchala shaxsni poraxo‘rlik fitnasi, elektron firibgarlik, pul yuvish va davlat mablag‘larini o‘g‘irlash bilan bog‘liq ayblovlar bo‘yicha aybdor deb topdi. Zubayr Al Zubayr qo‘shimcha ravishda soliq deklaratsiyalarini ataylab topshirmaganlikda ham ayblangan.
