Milliy mediada kadrlar salohiyatini yuksaltirishning amaliy natijalari: Navoiyda “Media haftalik” yakunlandi
Tadbir davomida 200 ga yaqin ishtirokchiga sertifikat, 12 nafar faol kontent-meykerga esa maxsus kartalar topshirildi.
Navoiy viloyatida bir necha kun davom etgan “Media haftalik” yakuniga yetdi. Tadbir milliy media sohasida kadrlar salohiyatini yuksaltirish, yosh jurnalist va kontent-meykerlarni qo‘llab-quvvatlash hamda tajriba almashish imkoniyatlarini kengaytirishga qaratildi.
Yakuniy bosqichda o‘tkazilgan Media forumda soha vakillari milliy axborot makonini zamonaviy talablar asosida rivojlantirish, sifatli media mahsulotlar yaratish hamda xalqaro maydonda raqobatbardoshlikni oshirish masalalarini muhokama qildilar.
Tadbir doirasida Yoshlar ishlari agentligi, O‘zbekiston Jurnalistlar uyushmasi hamda “Aloqabank” mutasaddilari ishtirokida ochiq muloqot tashkil etildi. Unda yosh kontent-meykerlar, bloger va jurnalistlarni tizimli qo‘llab-quvvatlash, ularning professional o‘sishini ta’minlash uchun taqdim etilayotgan yangi imkoniyat va imtiyozlar haqida batafsil so‘z yuritildi.
Haftalik doirasidagi nazariy bilimlar amaliy rag‘bat bilan uyg‘unlashib ketdi. O‘zlarining kreativ yondashuvi va izlanishlari uchun 12 nafar faol kontent-meyker maxsus plastik kartalar bilan taqdirlandi. Yangi g‘oyalarga ochiqligi hamda media sohasidagi zamonaviy bilim va ko‘nikmalarini oshirganining munosib e’tirofi sifatida 200 ga yaqin ishtirokchiga sertifikatlar topshirildi.
Navoiydagi mazkur “Media haftalik” turli avlod va qarashdagi media vakillarini bir maqsad yo‘lida birlashtirgan, fikr va tajriba almashinuvini yangi bosqichga olib chiqqan chinakam ijodiy platformaga aylandi. Eng muhimi, ushbu muloqot va ilgari surilgan tashabbuslar yaqin kelajakda yanada sifatli, global miqyosda raqobatbardosh va xalqchil milliy mediamizni shakllantirishda mustahkam poydevor bo‘lib xizmat qilishi qayd etildi.
