Olmaotadagi o‘zbek diplomatlari 82 nafar vatandoshga yordam ko‘rsatdi
Qiyin vaziyatga tushgan o‘zbekistonliklarga vaqtinchalik boshpana, tibbiy yordam va qaytish hujjatlari taqdim etildi.
Qozog‘istonning Olmaota shahridagi O‘zbekiston Bosh konsulligi tomonidan qiyin hayotiy vaziyatga tushib qolgan vatandoshlarga keng ko‘lamli yordam ko‘rsatildi. Bu haqda “Dunyo” axborot agentligi ma’lum qildi.
Qayd etilishicha, so‘nggi bir oy davomida diplomatlar tomonidan 82 nafar O‘zbekiston fuqarosiga konsullik, huquqiy, moliyaviy va amaliy yordam taqdim etilgan.
Jumladan, vaqtinchalik yashash joyiga ega bo‘lmagan 11 nafar fuqaro yotoqxonalarga joylashtirilgan. Moliyaviy qiyinchilikka duch kelgan yana 13 nafar vatandoshga O‘zbekistonga qaytish uchun aviachiptalar olib berilgan.
Shuningdek, noqonuniy ravishda ushlab qolingan 34 nafar fuqaroning pasportlari qaytarilishiga erishilgan. Shoshilinch tibbiy yordamga muhtoj bo‘lgan bir fuqaro kasalxonaga yotqizilib, davolanish xarajatlari davlat tomonidan qoplangan.
Bosh konsullik xodimlari vaqtinchalik saqlash muassasalarida bo‘lgan 221 nafar O‘zbekiston fuqarosi bilan onlayn uchrashuvlar o‘tkazib, ularning vataniga qaytishi uchun zarur hujjatlarni rasmiylashtirgan.
Bundan tashqari, Chimkent shahrida ko‘chma konsullik qabuli tashkil etilib, 60 dan ortiq fuqaroga biometrik pasport, fuqarolik va qaytish hujjatlari bo‘yicha xizmatlar ko‘rsatilgan.
Diplomatlar Olmaota va Chimkentdagi qurilish obyektlariga ham tashrif buyurib, 170 dan ortiq migrant bilan uchrashgan. Suhbatlar davomida fuqarolarga migratsiya qonunchiligiga rioya qilish, xorijdagi mehnat migrantlari uchun yaratilayotgan imkoniyatlar hamda noqonuniy va ekstremistik tashkilotlar faoliyatidan yiroq bo‘lish zarurligi tushuntirilgan.
