O‘zbekistonda “Oilamiz — kelajagimiz” oyligi o‘tkazilmoqda
Oylik doirasida bir qator yo‘nalishlarda oilalar “Ibratli oila” ko‘krak nishoni bilan taqdirlanadi.
O‘zbekistonda 15-may — Xalqaro oila kuni munosabati bilan “Oilamiz — kelajagimiz” oyligi boshlandi.
Ma’lum qilinishicha, Vazirlar Mahkamasining qaroriga muvofiq, may oyi davomida oila institutini mustahkamlash, milliy qadriyatlarni asrab-avaylash va yoshlarni mas’uliyatli oilaviy hayotga tayyorlashga qaratilgan tadbirlar o‘tkaziladi.
Oylik doirasida farovon va ahil oilalar tajribasini ommalashtirish, yoshlar orasida sog‘lom oila tushunchasini shakllantirish hamda oilalarda o‘zaro hurmat va mehr-oqibat muhitini mustahkamlash asosiy maqsad etib belgilangan.
Shuningdek, “Yangi O‘zbekistonning ibratli oilasi”, “Eng namunali yosh oila” va “Ibratli harbiy oilalar” kabi ko‘rik-tanlovlar tashkil etilishi rejalashtirilgan. Namunali oilalar “Ibratli oila” ko‘krak nishoni bilan taqdirlanadi. 2025-yilda mazkur mukofotga 2 mingta oila sazovor bo‘lgan.
Bundan tashqari, “Yangi O‘zbekistonda farovon oila modeli” mavzusida xalqaro ilmiy-amaliy konferensiya ham o‘tkaziladi.
Oylik doirasida oilaviy ajrimlarning oldini olish, yosh oilalarni qo‘llab-quvvatlash, aholiga psixologik va huquqiy maslahatlar berish bo‘yicha ham amaliy tadbirlar tashkil etiladi.
Shu bilan birga, sog‘lom turmush tarzini targ‘ib qilish maqsadida sport musobaqalari, marafonlar, shaxmat va stol tennisi bo‘yicha bellashuvlar ham o‘tkazilishi ko‘zda tutilgan.
