Toshkentda “Xalqaro migratsiya forumi — 2026” o‘tkaziladi
Forumda BMT tizimi, xalqaro tashkilotlar, vazirliklar, ekspertlar va xorijiy ish beruvchilar vakillari ishtirok etadi.
2026-yil 18–19 may kunlari Toshkent shahrida “Mehnat migrantlari va ularning oila a’zolarining ijtimoiy-huquqiy himoyasi” mavzusida “Xalqaro migratsiya forumi — 2026” bo‘lib o‘tadi.
Forum O‘zbekiston Respublikasi Vazirlar Mahkamasi huzuridagi Migratsiya agentligi hamda Xalqaro Migratsiya Tashkiloti hamkorligida tashkil etilmoqda.
Tadbir doirasida xalqaro ekspertlar ishtirokidagi plenar sessiyalar, mehnat migratsiyasi, malakalar, gender, yoshlar va iqlim masalalariga bag‘ishlangan panel muhokamalari o‘tkazilishi rejalashtirilgan.
Shuningdek, forum davomida ish beruvchilar bilan B2B, B2G va G2G formatidagi uchrashuvlar, xalqaro va mahalliy OAV vakillari uchun matbuot anjumani ham tashkil etiladi. Yangi hamkorlik kelishuvlari va qo‘shma tashabbuslarni ilgari surish masalalariga ham alohida e’tibor qaratiladi.
Forumda BMT tizimi va xalqaro tashkilotlar, davlat idoralari, Yevropa va Osiyo davlatlaridan ish beruvchilar, fuqarolik jamiyati institutlari, ekspertlar hamda ommaviy axborot vositalari vakillari qatnashadi. Tadbirda 300 dan ortiq xalqaro ishtirokchi ishtirok etishi kutilmoqda.
Forumning asosiy g‘oyasi sifatida “Xavfsiz, tartibli va qonuniy migratsiya — barqaror taraqqiyot asosi” tamoyili ilgari surilgan.
Forumda ishtirok etish uchun ro‘yxatdan o‘tish: timf.uz
