G‘alaba bog‘ida Ikkinchi jahon urushi qatnashchilari xotirasi yod etildi
Prokuratura organlari tomonidan urush faxriylari va front ortida xizmat qilganlar xotirasiga bag‘ishlangan tadbirlar tashkil etildi.
O‘zbekiston Prezidentining 2026-yil 16-apreldagi “9-may – Xotira va qadrlash kuniga tayyorgarlik ko‘rish va uni o‘tkazish chora-tadbirlari to‘g‘risida”gi PQ-139-son qarori ijrosi doirasida Bosh prokuratura, Toshkent shahar prokuraturasi, Harbiy va Transport prokuraturalari tomonidan qator xotira tadbirlari tashkil etildi.
Joriy yilning 8-may kuni Bosh prokuratura rahbariyati va jamoasi, Toshkent shahar, Harbiy hamda Transport prokuraturalari xodimlari, faxriylarni ijtimoiy qo‘llab-quvvatlash markazi vakillari va Jamoatchilik kengashi a’zolari bilan birgalikda Toshkent shahrining Olmazor tumanida joylashgan G‘alaba bog‘iga tashrif buyurdi.
Tadbir davomida “Matonat madhiyasi” yodgorligi poyiga gulchambar qo‘yilib, Vatan himoyasi yo‘lida jon fido qilgan ajdodlar xotirasiga hurmat bajo keltirildi.
Ma’lumotlarga ko‘ra, 1941–1945-yillarda prokuratura organlarida jami 500 nafar xodim faoliyat yuritgan bo‘lib, ularning qariyb 400 nafari urushga safarbar etilgan. Qolgan xodimlar esa front ortida mamlakatning ijtimoiy-iqtisodiy barqarorligini ta’minlash, front ehtiyojlari uchun resurslar yetkazib berish hamda O‘zbekistonga evakuatsiya qilingan voyaga yetmaganlarni qo‘llab-quvvatlash kabi muhim vazifalarni bajargan.
Shuningdek, tadbir doirasida prokuratura tizimida uzoq yillar samarali faoliyat yuritgan, Ikkinchi jahon urushi davrida jang maydonlarida jasorat ko‘rsatgan va front ortida fidokorona xizmat qilgan faxriylarning qabrlari ziyorat qilindi.
Dastlab Toshkent shahrining Yunusobod tumanidagi “Minor” qabristonida dafn etilgan faxriylar — Mannanov, Usmonov, Inomjonov va boshqa marhumlar xotirasi yod etildi.
Shundan so‘ng Olmazor tumanidagi “Chig‘atoy” qabristoniga tashrif buyurilib, Ustaboyev, Rashidov, Ro‘zmetov, Sheraliyev, Mustafoyev va boshqa faxriylarning qabrlari poyiga gullar qo‘yildi.
Tadbir davomida prokuratura rahbariyati marhum faxriylarning oila a’zolari bilan suhbatlashib, ularning holidan xabar oldi.
Qayd etilishicha, bu kabi xotira va ehtirom tadbirlari respublikaning boshqa hududlarida ham davom ettirilmoqda.
