Bosh prokuror ishtirokida 9-may – Xotira va qadrlash kuniga bag‘ishlangan tadbirlar o‘tkazildi
Tadbirlar doirasida Ikkinchi jahon urushi yillarida xizmat qilgan marhum prokuratura faxriylarining qabrlari ziyorat qilindi.
9-may – Xotira va qadrlash kuni munosabati bilan Bosh prokuror ishtirokida qator xotira tadbirlari tashkil etildi.
Tadbir doirasida Bosh prokuratura rahbariyati va jamoasi, faxriylar bilan birgalikda Toshkent shahridagi “G‘alaba bog‘i” yodgorlik majmuasiga tashrif buyurdi.
An’anaga muvofiq, “Matonat madhiyasi” yodgorligi poyiga gulchambar qo‘yilib, Vatan himoyasi yo‘lida halok bo‘lganlar xotirasiga hurmat bajo keltirildi.
Shuningdek, ilgari prokuratura organlarida uzoq yillar samarali faoliyat yuritgan, Ikkinchi jahon urushi yillarida jang maydonlarida jasorat ko‘rsatgan hamda front ortida fidokorona xizmat qilib, qonuniylik va huquq-tartibotni ta’minlashga munosib hissa qo‘shgan marhum prokuratura faxriylarining qabrlari ziyorat qilindi.
