Toshkent viloyatidagi bog‘cha bolalari sutdan emas, go‘shtdan zaharlanganmi?
Jinoyat ishlari bo‘yicha Bo‘ka tuman sudida bog‘chalarda bolalar zaharlanganiga oid navbatdagi ochiq sud bo‘ldi.
Dastlabki taxminlarga ko‘ra, tarbiyalanuvchilar 3,2 foizli kefirdan zaharlangan. O‘rganishda ushbu mahsulot Oqqo‘rg‘on tumanidagi sexlarning birida ishlab chiqarilgani aniqlangan.
Toshkent viloyatidagi maktabgacha taʼlim muassasalarida jami 1,9 mingdan ortiq bola zaharlanish holati yuz bergandan keyin 11 nafar shaxsga nisbatan xavfsizlik talablariga javob bermaydigan mahsulotlarni ishlab chiqarish va sanitariya qoidalarini buzishda ayblanib sud bo‘lib o‘tayotgani haqda xabar bergan edik. 1 922 nafar bola kefir isteʼmolidan 2–6 soat o‘tib shifoxonalarga murojaat qilgan.
Sud jarayonida ayrim ota-onalar farzandlari sut mahsulotlari isteʼmol qilmasligini daʼvo qilgan.
Bugun Jinoyat ishlari bo‘yicha Bo‘ka tuman sudi raisi Muso Yusupov raisligida o‘tgan sudga O‘zbekiston RespublikasiVeterinariya va chorvachilikni rivojlantirish qo‘mitasi xodimlari chaqirtirildi.
Ekspertlar mol go‘shti va boshqa oziq-ovqat mahsulotlariga Respublika Veterinariya va chorvachilikni rivojlantirish qo‘mitasi huzuridagi Hayvonot kasalliklarini tashxisi va oziq-ovqat mahsulotlari xavfsizligi bo‘yicha Respublika davlat markazi tomonidan tahlil o‘tkazilgan va ekspertiza xulosasi haqida ko‘rsatma berildi.
