Kim Chen Inga suiqasd qilinsa, Shimoliy Koreya avtomatik yadroviy zarba beradi

Shimoliy Koreya yetakchisi Kim Chen In mamlakat konstitutsiyasiga o‘zgartirish kiritib, o‘ziga suiqasd uyushtirilgan taqdirda avtomatik yadroviy javob zarbasi berilishini nazarda tutuvchi yangi tartibni joriy etdi. Bu haqda Daily Mail xabar berdi.

 

Ma’lum qilinishicha, o‘zgartirishlar 15-chaqiriq Oliy xalq majlisining Pxenyanda bo‘lib o‘tgan sessiyasida qabul qilingan. Yangi tartibga ko‘ra, agar Shimoliy Koreya rahbari halok bo‘lsa yoki qurolli kuchlarni boshqarish imkoniyatidan mahrum etilsa, mamlakat yadroviy tizimi “avtomatik va zudlik bilan” javob zarbasini amalga oshirishi mumkin.

 

Tahlilchilarga ko‘ra, Pxenyanning bu qarori AQSH va Isroilning Eronga bergan zarbalari hamda Eron oliy rahnamosi Ali Xomanaiy atrofidagi yuqori martabali shaxslar nishonga olingani fonida qabul qilingan. Ekspertlar Shimoliy Koreya rahbariyati Tehrondagi voqealarni o‘z xavfsizligi uchun jiddiy signal sifatida baholaganini ta’kidlamoqda.

 

Seuldagi Kookmin University professori Andrey Lankovning fikricha, Pxenyan Eron rahbariyatiga qarshi amalga oshirilgan tezkor va aniq hujumlarni diqqat bilan kuzatgan. Unga ko‘ra, Shimoliy Koreya urushning ilk bosqichidayoq davlat rahbari yo‘q qilingan holatda ham javob zarbasi berish imkoniyatini saqlab qolishga urinmoqda.

 

Ekspertlar Kim Jong Unning xavfsizlik masalasiga alohida e’tibor qaratishini ham eslatmoqda. Shimoliy Koreya yetakchisi odatda kuchaytirilgan qo‘riqlov ostida harakatlanadi, safarlarida esa zirhli maxsus poyezddan foydalanadi.

 

Shuningdek, tahlilchilar Shimoliy Koreyaning tashqi dunyodan yakkalanganligi sababli mamlakat ichida razvedka operatsiyalarini amalga oshirish Erondagiga qaraganda ancha murakkab bo‘lishini qayd etmoqda. Mamlakatdagi qat’iy nazorat tizimi, yopiq chegaralar va cheklangan aloqa infratuzilmasi bunga asosiy omil sifatida ko‘rilmoqda.

 

Xabarlar fonida Shimoliy Koreya Janubiy Koreya chegarasi yaqiniga yangi turdagi uzoq masofali artilleriya tizimlarini joylashtirish rejasini ham e’lon qildi. Koreya Markaziy yangiliklar agentligi ma’lumotigа ko‘ra, Kim Jong Un yangi 155 millimetrlik o‘ziyurar gaubitsa ishlab chiqarilayotgan harbiy zavodga tashrif buyurgan.

 

Davlat OAVlari ushbu artilleriya tizimining zarba masofasi 37 mildan ortiqligini va yil oxiridan boshlab front hududlaridagi bo‘linmalarga yetkazib berilishi rejalashtirilganini bildirdi. Tahlilchilarga ko‘ra, bunday qurollar Seul va uning atrofidagi zich aholi yashaydigan hududlarni nishonga olish imkonini beradi.