O‘zbekiston koreys tili maktablari soni o‘sishi bo‘yicha dunyoda yetakchi bo‘ldi
So‘nggi bir yil davomida mamlakatda koreys tiliga ixtisoslashgan sinflarga ega yana 68 ta ta’lim muassasasi tashkil etilgan.
O‘zbekiston koreys tili o‘qitiladigan maktablar sonining o‘sishi bo‘yicha dunyoda yetakchi davlatga aylandi. Bu haqda Yonhap xabar berdi.
Ma’lum qilinishicha, so‘nggi bir yil davomida mamlakatda koreys tiliga ixtisoslashgan sinflarga ega yana 68 ta ta’lim muassasasi tashkil etilgan.
Ushbu ko‘rsatkich bo‘yicha O‘zbekiston Vyetnam, Shri Lanka, Filippin, Braziliya va AQSHdan oldinga chiqdi.
Mutaxassislar koreys tiliga qiziqish ortishini yoshlar orasida Janubiy Koreya madaniyatining keng ommalashayotgani bilan izohlamoqda.
Xususan, K-pop, doramalar hamda internet platformalari bu jarayonga sezilarli ta’sir ko‘rsatmoqda. Shuningdek, Janubiy Koreyada ta’lim olish istagi ham tobora ortib bormoqda.
Qayd etilishicha, Janubiy Koreya tashkilotlari tomonidan ta’lim dasturlarining qo‘llab-quvvatlanayotgani ham muhim omillardan biri bo‘lgan. Loyihalar doirasida sinf xonalari jihozlanib, maxsus o‘quv adabiyotlari yetkazib berilmoqda hamda o‘qituvchilar malakasi oshirilmoqda.
2025-yil yakunlariga ko‘ra, dunyo bo‘ylab qariyb 2,7 mingta maktabda koreys tili o‘qitilgan. So‘nggi to‘rt yil ichida bunday ta’lim muassasalari soni 54 foizga oshgan. Hozirda Janubiy Koreyadan tashqarida koreys tilini o‘rganayotgan o‘quvchilar soni 236 ming nafarga yetgan.
Bugungi kunda Janubiy Koreya universitetlari o‘zbekistonlik yoshlar orasida ommabop yo‘nalishlardan biri hisoblanadi. Respublikada qo‘shma ta’lim dasturlari va Koreya oliy ta’lim muassasalari filiallari faoliyat yuritmoqda.
Turli madaniy festivallar, til olimpiadalari va akademik almashinuv dasturlari ham koreys tilini o‘rganayotganlar sonining ortishiga xizmat qilmoqda.
