Toshkentda ota farzandi uchun 121 mln so‘m aliment oldindan to‘ladi
Erkak shu tariqa farzandi 18 yoshga to‘lguncha bo‘lgan aliment to‘lovlarini amalga oshirgan.
Majburiy ijro byurosi Mirzo Ulug‘bek tuman bo‘limi ish yurituviga fuqarolik ishlari bo‘yicha Mirzo Ulug‘bek tumanlararo sudining 30.07.2012 yildagi ijro varaqasiga asosan qarzdor T.A.dan undiruvchi g.I. foydasiga voyaga yetmagan bir nafar farzandi taʼminoti uchun daromadining 1/4 qismi miqdorida aliment undirish haqidagi ijro hujjati 2019 yil aprel oyida kelib tushgan.
Shundan so‘ng davlat ijrochisi tomonidan qonunchilikda belgilangan tartibda ijro ishi qo‘zg‘atilib, qarzdor otaga aliment to‘lovlarini o‘z vaqtida amalga oshirish bo‘yicha huquqiy tushuntirishlar berilgan. Aliment undiruvini ish haqiga qaratish maqsadida ish joyiga talabnoma yuborilib, to‘lovlar muntazam ravishda undirib kelingan.
Biroq bu voqea oddiy ijro ishidan ko‘ra, insoniy masʼuliyat va farzand taqdiriga befarq bo‘lmagan ota qarori bilan ahamiyatli bo‘ldi.
Aliment to‘lovi 2030 yilga qadar davom etishi belgilangan bo‘lsa-da, qarzdor ota farzandining kelajagini o‘ylab, uning 18 yoshga to‘lguniga qadar bo‘lgan aliment mablag‘larini oldindan to‘lash istagini bildirdi. Undiruvchi bilan o‘zaro kelishuvga erishilib, davlat ijrochisining huquqiy tushuntirishlari va amaliy ko‘magi natijasida 4 yillik aliment pullari to‘liq undirib berildi.
Shu tariqa, bir nafar farzand taʼminoti uchun jami 121 million so‘m miqdoridagi aliment mablag‘i oldindan to‘lab berildi.
