Bozor faoliyatidagi ortiqcha talablar 30 foizga qisqartiriladi
Majburiy talablar yagona reyestrga kiritilib, elektron monitoring tizimi joriy etiladi.
Majburiy talablarni maqbullashtirish va byurokratik yukni qisqartirish bo‘yicha yangi tizim joriy etiladi.
Taqdimotda tadbirkorlik faoliyatiga oid majburiy talablarni qayta ko‘rib chiqish va ularni maqbullashtirish masalalari atroflicha ko‘rib chiqildi.
Qayd etilishicha, bugungi kunda bozorlar faoliyatiga doir 20 ga yaqin hujjatda 500 dan ortiq talablar tarqoq holda qo‘llanilmoqda. Ularni tizimlashtirish orqali mavjud talablarning 30 foizdan ortig‘ini maqbullashtirish imkoniyati mavjudligi ta’kidlandi.
Shuningdek, sanitariya talablariga muvofiqlik bo‘yicha dalolatnomalarni shakllantirish hamda tekshiruvdan o‘tadigan xodimlar ro‘yxatini elektron tizim orqali yuritish imkoniyatlari mavjudligi qayd etildi.
Taqdimotda tadbirkorlik sohasidagi barcha majburiy talablarni yagona Majburiy talablar reyestriga kiritish, ularni amaliy ko‘rsatkichlar asosida baholash hamda kompleks monitoring tizimini joriy etish taklif qilindi.
Bundan tashqari, BAA va Singapur tajribasi asosida samarasiz, eskirgan va ortiqcha byurokratik talablarni bosqichma-bosqich bekor qilish, “Biznes kalkulyatori”, “gilyotina” usuli hamda “one in — one out” mexanizmlarini joriy etish rejalashtirilmoqda.
Shuningdek, har bir talabning samaradorligini muntazam monitoring qilish hamda har uch yilda uning natijadorligini qayta baholash tizimi yo‘lga qo‘yilishi nazarda tutilgan.
