Jurnalistlar uyushmasida “Ommaviy axborot vositalarida oila mavzusi yoritilishi”ga bag‘ishlangan yig‘ilish o‘tkazildi
Tadbir doirasida Nozima Vohidova “Ibratli oila” koʻkrak nishoni bilan taqdirlandi.
2026-yil 13-may kuni Oʻzbekiston Jurnalistlar uyushmasida 15-may — Xalqaro oila kuni munosabati bilan “Ommaviy axborot vositalarida oila mavzusini yoritishning dolzarb masalalari” mavzusida Jurnalist ayollar kengashining yigʻilishi boʻlib oʻtdi. Tadbirda kengash aʼzolari, ayol jurnalistlar hamda ommaviy axborot vositalari vakillari ishtirok etdi.
Yigʻilish davomida ommaviy axborot vositalarida oila mavzusini yoritish masalalari, milliy qadriyatlar, oilaviy muhitning jamiyat taraqqiyotidagi oʻrni, ayollarning oiladagi masʼuliyati hamda farzand tarbiyasidagi beqiyos hissasi haqida fikr almashildi.
Soʻzga chiqqanlar oila jamiyatning tayanchi, maʼnaviyat va tarbiya maskani ekanini alohida taʼkidladilar. Shuningdek, bugungi globallashuv davrida OAV vakillarining oilaviy qadriyatlarni targʻib etish, yoshlarni sogʻlom turmush tarziga yoʻnaltirish hamda jamiyatda mehr-oqibat va oʻzaro hurmat muhitini mustahkamlashdagi oʻrni muhim ekani qayd etildi.
Tadbirda jurnalistlarning bu boradagi masʼuliyati, media materiallarda oilaga oid mavzularni haqqoniy va taʼsirchan yoritish masalalariga ham alohida eʼtibor qaratildi.
Tadbir doirasida O'zbekiston milliy teleradiokompaniyasi «Madaniyat va ma'rifat» telekanali» davlat muassasasi «Kino-videomahsulotlar va tezkor dublyaj» muharririyatining katta muharriri Nozima Vohidova Vazirlar Mahkamasining 2023-yil 2-sentabrdagi “Ibratli oila” koʻkrak nishoni toʻgʻrisidagi nizomni tasdiqlash haqidagi 437-son qaroriga asosan “Ibratli oila” koʻkrak nishoni bilan tantanali ravishda taqdirlandi.
Yigʻilish yakunida oilaviy qadriyatlarni keng targʻib qilish, ayol jurnalistlarni qoʻllab-quvvatlash hamda OAVda oila mavzusidagi materiallar sifatini yanada oshirish yuzasidan taklif va tavsiyalar bildirildi.
