Toshkent bozorlarida bo‘yalgan pomidorlar sotilayotgani rad etildi
Sanepidqo‘m xodimlari tomonidan poytaxtdagi barcha oziq-ovqat bozorlari o‘rganildi.
Ijtimoiy tarmoqlarda Toshkent bozorlarida kimyoviy bo‘yoqlar bilan ishlov berilgan pomidorlar ommaviy sotilayotgani haqida tarqalgan xabarlar rad etildi.
Ma’lum qilinishicha, Toshkent shahar Sanitariya-epidemiologik osoyishtalik va jamoat salomatligi boshqarmasi xodimlari tomonidan poytaxtdagi barcha oziq-ovqat bozorlaridagi holat o‘rganildi.
Tekshiruv yakunlariga ko‘ra, kimyoviy bo‘yoqlar bilan ishlov berilgan sabzavot mahsulotlari sotilayotgani holatlari aniqlanmadi.
Shahar hokimligi aholiga oziq-ovqat mahsulotlari xavfsizligi masalalariga befarq bo‘lmagani va faol fuqarolik pozitsiyasi uchun minnatdorlik bildirdi.
Shuningdek, ma’lumotlarni tarqatishdan oldin vakolatli organlardan aniqlashtirish lozimligini, noto‘g‘ri ma’lumotlarni tarqatish qonunchilikka muvofiq javobgarlikka sabab bo‘lishi mumkinligini eslatdi.
