AQSH JCh muxlislari uchun viza garovi talabini bekor qildi

AQSH hukumati futbol bo‘yicha 2026-yilgi Jahon chempionatiga yo‘llanma olgan ayrim davlatlar fuqarolari uchun mamlakatga kirishda amal qilgan viza garovi talabini bekor qildi. Bu haqda AQSH Davlat departamentiga tayanib AP xabar berdi.

 

Qarorga ko‘ra, FIFA’dan rasmiy chipta xarid qilgan Jazoir, Kabo-Verde, Kot-d’Ivuar, Senegal va Tunis fuqarolari endilikda AQSHga kirishda 5 ming dollardan 15 ming dollargacha bo‘lgan garov pulini to‘lamaydi.

 

Mazkur garov tizimi Tramp ma’muriyati tomonidan o‘tgan yili joriy etilgan bo‘lib, u vizasi muddati tugaganidan keyin AQSH hududida qolib ketish holatlari yuqori deb baholangan davlatlar fuqarolariga tatbiq etilgan edi. Hozirda bunday talab 50 ta mamlakat fuqarolariga nisbatan qo‘llanadi.

 

AQSH Davlat departamenti Konsullik ishlari bo‘yicha yordamchi kotibi Mora Namdar mamlakat tarixdagi “eng yirik va eng yaxshi” FIFA Jahon chempionatiga mezbonlik qilishga tayyorlanayotganini ta’kidladi.

 

“Jahon chempionati chiptasini xarid qilgan va FIFA Pass tizimida ro‘yxatdan o‘tgan muxlislar uchun viza garovlari bekor qilinmoqda”, — dedi u.

 

Qayd etilishicha, FIFA Pass tizimi xorijlik muxlislarga vizani tezlashtirilgan tartibda rasmiylashtirish imkonini beradi. Futbolchilar, murabbiylar hamda turnir bilan bog‘liq ayrim rasmiy xodimlar esa avvaldan ushbu talabdan ozod etilgan edi.

 

FIFA ham qarorni AQSH hukumati va Oq uy bilan olib borilgan hamkorlik natijasi sifatida baholadi. Tashkilot bayonotida bu qadam “muvaffaqiyatli, rekord darajadagi va unutilmas global turnir” o‘tkazishga xizmat qilishi ta’kidlangan.

 

Shu bilan birga, AQSH ma’muriyatining immigratsiya siyosati Jahon chempionati arafasida ham tanqid qilinmoqda. Xususan, ayrim davlatlar fuqarolari uchun sayohat cheklovlari saqlanib qolmoqda. Eron va Gaiti fuqarolarining AQSHga kirishi taqiqlangan bo‘lsa, Kot-d’Ivuar va Senegal fuqarolariga nisbatan qisman cheklovlar amal qiladi.

 

Bundan tashqari, inson huquqlari tashkilotlari xorijlik sayohatchilar uchun vizalar, chegaradagi tekshiruvlar va immigratsiya siyosati bilan bog‘liq xavotirlar kuchayganini bildirgan. Xalqaro amnistiya tashkiloti  va AQSHdagi bir qator fuqarolik tashkilotlari shu munosabat bilan “Jahon chempionati sayohat ogohlantirishi”ni ham e’lon qilgan.

 

AQSH mehmonxona sohasi vakillari esa viza cheklovlari va geosiyosiy omillar sabab xorijiy muxlislar oqimi kutilganidan past bo‘lishi mumkinligini qayd etmoqda.

 

2026-yilgi futbol bo‘yicha Jahon chempionati 11-iyun kuni boshlanadi. Turnirga AQSH, Kanada va Meksika mezbonlik qiladi.