Netanyaxu urush davrida BAAga maxfiy tashrif buyurgan
“Mossad” rahbari ham mojaro davomida hamkorlikni muvofiqlashtirish maqsadida kamida ikki marta BAAga borgan.
Isroil Bosh vaziri Binyamin Netanyaxu Eron bilan urush davrida yashirin ravishda Birlashgan Arab Amirliklariga tashrif buyurgani ma’lum bo‘ldi. Bu haqda Times of Israel xabar berdi.
Bosh vazir idorasi xabariga ko‘ra, Netanyaxu BAA prezidenti Shayx Muhammad bin Zoid bilan uchrashuv o‘tkazgan. Idora bayonotida ushbu tashrif Isroil va BAA o‘rtasidagi munosabatlarda “tarixiy yutuq” bo‘lgani ta’kidlangan.
Avvalroq AQSHning yuqori martabali amaldorlari Isroil Eron bilan urush vaqtida BAAga “Iron Dome” havo mudofaa tizimi hamda uni boshqaruvchi harbiylarni yuborganini tasdiqlagan edi.
The Wall Street Journal nashrining arab amaldorlari va vaziyatdan xabardor manbalarga tayanib yozishicha, “Mossad” rahbari David Barnea ham mojaro davomida hamkorlikni muvofiqlashtirish maqsadida kamida ikki marta BAAga borgan.
Manbalarga ko‘ra, Isroil va BAA Eronning yirik neft-kimyo obyektiga uyushtirilgan hujumni ham muvofiqlashtirgan bo‘lishi mumkin.
Eslatib o‘tamiz, Isroil va BAA 2020-yilda diplomatik munosabatlarni normallashtirgan edi. 2018-yilda ham Netanyaxuning Shayx Muhammad bin Zoid bilan yashirin uchrashuv uchun BAAga borgani haqida xabarlar tarqalgan.
