Oʻzbekistonda tugʻilganlik haqidagi maʼlumotnomani endi onlayn olish mumkin
2023-yildan keyin tugʻilgan bolalar uchun tugʻilganlik haqidagi maʼlumotnoma elektron shaklda taqdim etiladi.
Oʻzbekistonda tugʻilganlik haqidagi maʼlumotnomani endilikda onlayn tarzda olish imkoniyati yaratildi. Yangi xizmat orqali fuqarolar tugʻilganlik haqida dalolatnoma yozuvi qayd etilganligi toʻgʻrisidagi maʼlumotnomani my.gov.uz portali orqali elektron shaklda yuklab olishlari mumkin boʻladi.
Qayd etilishicha, Vazirlar Mahkamasining 550-son qaroriga muvofiq, 2023-yildan boshlab tugʻilganlikni qayd etish kompleks davlat xizmati asosida amalga oshirilmoqda. Mazkur tartibga koʻra, tugʻruqxona chaqaloq haqidagi maʼlumotlarni elektron tarzda FHDY organlariga yuboradi va hujjatlar avtomatik shakllantiriladi.
Avval faqat tugʻruqxona tomonidan QR-kodli shaklda berilgan maʼlumotnoma endi my.gov.uz portali orqali ham taqdim etiladi. Ushbu hujjat tugʻilganlik haqidagi gerbli guvohnomaga tenglashtirilgan.
Xizmatdan foydalanish uchun foydalanuvchi my.gov.uz portaliga ERI yoki OneID orqali kiradi. Farzand tugʻilganligi FHDY organida qayd etilgach, onaning shaxsiy kabinetiga elektron xabarnoma yuboriladi. Soʻng “Maʼlumotnomalar” bo‘limi orqali kerakli hujjatni yuklab olish mumkin bo‘ladi.
Mazkur xizmat bepul taqdim etiladi hamda ortiqcha qogʻozbozlikni bartaraf etadi. Shuningdek, maʼlumotnoma yoʻqolgan taqdirda uni istalgan vaqtda portal orqali qayta yuklab olish imkoniyati mavjud.
Taʼkidlanishicha, xizmat 2023-yil va undan keyin tugʻilgan bolalar uchun amal qiladi.
