Toshkentda taqiqlangan joyda qoldirilgan avtomobillar jarima maydonchasiga olib ketiladi
Endilikda piyodalar yo‘laklari, bekatlar va to‘xtash va to‘xtab turish taqiqlangan hududlarda qoldirilgan avtomobillar evakuatsiya qilinadi.
Toshkentda to‘xtash va to‘xtab turish qoidalarini buzgan haydovchilarga nisbatan choralar kuchaytiriladi. Bu haqda poytaxt hokimligi hamda Yo‘l harakatini tashkil etish markazi ma’lum qildi.
Qayd etilishicha, shaharning turli hududlarida avtomobillarning piyodalar yo‘laklari, bekatlar, yashil hududlar va taqiqlovchi belgilar o‘rnatilgan joylarda qoldirilishi holatlari ko‘paygan. Mutasaddilar bunday qoidabuzarliklar piyodalar, jamoat transporti va maxsus texnikalar harakatiga xalaqit berayotganini bildirgan.
Ayniqsa, bu holatlar keksalar, nogironligi bo‘lgan shaxslar hamda bolali ota-onalar uchun qiyinchilik tug‘dirayotgani ta’kidlangan.
Shu munosabat bilan, endilikda qoidabuzarlik bilan qoldirilgan avtomobillar evakuatsiya qilinib, maxsus jarima maydonchalariga olib ketiladi.
Hokimlikka ko‘ra, ushbu choralar ko‘chalarda tartibni saqlash, harakat xavfsizligini oshirish va jamoat joylarini аholi uchun qulay holga keltirishga qaratilgan.
