Isroilliklarning aksariyati Netanyaxuning siyosatdan ketishini istamoqda
Aholining yarmidan ko‘pi Netanyaxu siyosiy faoliyatini yakunlashi kerak deb hisoblaydi.
Isroilda o‘tkazilgan yangi so‘rovnoma natijalariga ko‘ra, fuqarolarning aksariyati bosh vazir Binyamin Netanyaxuning yaqinlashayotgan Knesset saylovlarida qatnashmasligi va siyosatdan ketishini qo‘llab-quvvatlamoqda. Bu haqda Maariv gazetasiga tayanib, Jerusalem Post xabar berdi.
Gazeta e’lon qilgan tadqiqotga ko‘ra, respondentlarning 55 foizi Netanyaxu siyosiy faoliyatini yakunlashi kerak deb hisoblaydi. 38 foiz ishtirokchi esa uning Likud partiyasiga yetakchilik qilgan holda saylovda qatnashishini ma’qullagan. Yana 7 foiz respondent bu borada aniq fikr bildirmagan.
So‘rov natijalari hukmron koalitsiyaning parlamentdagi pozitsiyasi zaiflashayotganini ham ko‘rsatgan. Tadqiqotga ko‘ra, Likud va Itamar Ben-Gvirning “Otzma Yehudit” partiyasi bittadan mandat yo‘qotmoqda. Natijada hukmron koalitsiya 49 o‘rin bilan cheklanmoqda.
Shu bilan birga, muxolifat blokining ko‘rsatkichlari yaxshilanib, arab partiyalarisiz hisoblanganda 61 mandatga yetayotgani qayd etilgan. Bu esa Knessetda ko‘pchilikni shakllantirish uchun yetarli hisoblanadi.
So‘rovnoma ayrim ehtimoliy siyosiy ittifoqlarni ham tahlil qilgan. Xususan, Gadi Ayzenkotning sobiq bosh vazirlar Naftali Bennet va Yair Lapid bilan birlashishi holatida qo‘shma ro‘yxat 49 mandat olishi mumkinligi qayd etilgan.
Tadqiqot Lazar Research markazi tomonidan Panel4All hamkorligida 12–13-may kunlari o‘tkazilgan. Unda Isroilning 18 yoshdan katta 502 nafar yahudiy va arab fuqarosi ishtirok etgan.
