O‘zbekistonda noqonuniy tamaki aylanmasi 24,8 foizdan 7 foizga kamaydi

 

Toshkent shahrida “nikotin muqobillarini tartibga solishning dolzarbligi: jamoat salomatligi va iqtisodiy manfaatlar muvozanati” mavzusida davra suhbati o‘tkazildi.

Tadbir Zamonaviy jurnalistikani rivojlantirish markazi tomonidan tashkil etildi. Unda davlat organlari vakillari, soha mutaxassislari hamda ekspertlar ishtirok etib, O‘zbekistonda nikotin mahsulotlarini tartibga solish bo‘yicha amalga oshirilayotgan islohotlar, noqonuniy bozor ulushi va jamoat salomatligini ta’minlashda xavfga asoslangan yondashuvning xalqaro tajribasi muhokama qilindi.

 

         

Unda Alkogol va tamaki bozorini tartibga solish inspeksiyasi vakillari so‘zga chiqib, tamaki mahsulotlarining noqonuniy aylanmasiga qarshi kurashish, yashirin iqtisodiy faoliyatni aniqlash va oldini olishga qaratilgan profilaktik chora-tadbirlar samaradorligi yuzasidan ma’lumot berdi.

 

     

Ta’kidlanishicha, Iqtisodiy jinoyatlarga qarshi kurashish departamenti bilan hamkorlikda jami 1 655 ta tezkor tadbir o‘tkazilgan. Ular natijasida iste’molga yaroqsiz hamda inson salomatligi uchun xavfli bo‘lgan 48,7 mlrd so‘mlik alkogol va spirt mahsulotlari hamda 49,3 mlrd so‘mlik tamaki mahsulotlari muomaladan chiqarilgan.

Shuningdek, amalga oshirilayotgan tizimli chora-tadbirlar natijasida noqonuniy tamaki aylanmasi 2023-yildagi 24,8 foizdan 2025-yil yakuniga kelib 7 foizgacha kamaytirilgani qayd etildi.

 

     

Yig‘ilish davomida ishtirokchilar yashirin bozor tufayli yuzaga kelayotgan iqtisodiy yo‘qotishlar, sohani yanada shaffof tartibga solish mexanizmlari hamda kelgusidagi islohotlar yuzasidan fikr almashdilar.

 

     

 

Davra suhbati yakunlari bo‘yicha ishtirokchilar tomonidan O‘zbekistonda nikotin muqobillarini tartibga solish masalalarini kelgusida ekspertlar muhokamasiga taqdim etish uchun tavsiya va takliflar tayyorlandi.