Bibixonim madrasasini nega Amerika ta’mirlab beryapti?

 

Samarqanddagi Bibixonim madrasasini nega Amerika hukumati ta'mirlab beryapti? Axir har yili qo'mitaga ham, tarixiy binolarni ta’mirlash ishlariga ham byudjetdan katta mablag’ ajratiladi. Buni O'zbekiston o'z hisobidan amalga oshira olmaydimi? Zamon.uz jurnalistining mazkur savoliga Turizm qo’mitasi raisi Abdulaziz Aqqulov Turizm sohasida amalga oshirilayotgan islohotlar bo‘yicha tashkil etilgan matbuot anjumanida javob berdi.

Raisning ta’kidlashicha, ushbu tarixiy obidaning restavratsiyasi masalasi davlat rahbari e’tiboridagi muhim yo‘nalishlardan biri bo‘lib, ishlar avvalo chuqur ilmiy va texnik o‘rganishlarni talab etadi.

Binoning ichki holatini to‘liq baholash, tegishli o'rganishlar o‘tkazish hamda to‘g‘ri restavratsiya usulini belgilash uchun mutaxassislar tomonidan kompleks tadqiqotlar olib borilishi zarur. Ushbu jarayon esa ma’lum vaqtni talab etadi.

Shuningdek, tarixiy obidalarni tiklash va konservatsiya qilish sohasida xorijiy mutaxassislarning tajribasi muhim ahamiyat kasb etishi ta’kidlandi.

“Mutaxassislar asosiy muammo, ular tomonidan aniq xulosa berilsa, restavratsiya ishlari O‘zbekistonning o‘zi ham tegishli direksiyalari tomonidan amalga oshirishi mumkin. Moliyalashtirish masalasida esa davlat rahbari tomonidan barcha xarajatlarni qoplashga tayyorlik bildirilgan,” — dedi Abdulaziz Aqqulov.

Qayd etilishicha, jarayon shoshilinch emas, balki ehtiyotkorlik va ilmiy yondashuv asosida olib boriladi. Dastlabki o‘rganish ishlari yarim yildan bir yilgacha davom etishi mumkin.

Mutasaddilar ta’kidlashicha, ushbu turdagi restavratsiya ishlarida xalqaro tajriba va texnologiyalarni jalb qilish muhim bo‘lib, jarayonni boshlagan mutaxassislardan uni yakuniga yetkazishi ham talab etiladi.