Toshkent – Issiqko‘l yo‘nalishida yangi aviaqatnov yo‘lga qo‘yiladi
Dastlabki reys 2026-yil 24-iyunda Toshkent – Tamchi yo‘nalishida amalga oshirilishi kutilmoqda.
2026-yil 15-may kuni “O‘zbekiston aeroportlari” AJda Qirg‘izistonning “Asman Airlines” aviakompaniyasi vakillari bilan uchrashuv bo‘lib o‘tdi. Unda ikki davlat o‘rtasida yo‘lovchi tashish yo‘nalishlarini kengaytirish, yangi aviayo‘nalishlar ochish hamda mavjud aeroportlar o‘rtasidagi hamkorlikni mustahkamlash masalalari muhokama qilindi.
Muzokaralar davomida “Asman Airlines” aviakompaniyasi Toshkent xalqaro aeroporti hamda Qirg‘iziston aeroportlari o‘rtasida muntazam parvozlarni yo‘lga qo‘yish bo‘yicha o‘z rejalarini taqdim etdi.
Dastlabki bosqichda Toshkent – Tamchi (Issiqko‘l) yo‘nalishida muntazam reyslarni yo‘lga qo‘yish ko‘zda tutilgan bo‘lib, ushbu parvozlarni 2026-yil 24-iyundan boshlash rejalashtirilgan. Reyslar “Dash 8-400” turidagi havo kemalarida amalga oshirilishi belgilangan.
Shuningdek, kelgusida aviakompaniya marshrut tarmog‘ini kengaytirish ham rejalashtirilgan. Xususan, kuz mavsumiga qadar Toshkent – Osh yo‘nalishida, qish mavsumida esa Toshkent – Qorako‘l yo‘nalishida reyslarni yo‘lga qo‘yish masalalari ko‘rib chiqilmoqda. Bundan tashqari, Toshkent – Bishkek yo‘nalishida ham muntazam aviqatnovlarni ochish imkoniyati o‘rganilmoqda.
“Asman Airlines” Qirg‘izistonning davlat aviakompaniyasi bo‘lib, “Qirg‘iziston aeroportlari” AJ tarkibidagi sho‘ba korxona hisoblanadi. Hozirda aviakompaniya ichki yo‘nalishlar bilan birga Olmaota va Xo‘jand kabi xalqaro yo‘nalishlarda ham parvozlarni amalga oshirib kelmoqda.
