Toshkentda haydovching jarimasi 311 mln so‘mdan oshdi
U 2024-yil aprel oyidan boshlab yo‘l harakati qoidalarini 912 marta buzgan. Jarimalarni o‘z vaqtida to‘lamagan.
Toshkent shahrida yo‘l harakati qoidalarini muntazam ravishda qo‘pol buzib kelgan “Matiz” avtomobili haydovchisiga nisbatan 311 million so‘mdan ortiq qarzdorlik shakllandi. Bu haqda Majburiy ijro byurosi xabar berdi.
Ma’lumotlarga ko‘ra, MIB Toshkent shahar boshqarmasi 2-tumanlararo bo‘limi ish yurituvida Toshkent shahar IIBB YHXB tomonidan chiqarilgan ma’muriy qarorlar asosida ijro hujjatlari yuritilgan.
Aniqlanishicha, fuqaroga tegishli “Matiz” avtomobili 2024-yil aprel oyidan boshlab yo‘l harakati qoidalarini muntazam buzib kelgan. Natijada jami 912 ta ma’muriy jarima rasmiylashtirilib, umumiy qarzdorlik 311 million so‘mdan oshgan.
Idora ma’lumotida qayd etilishicha, haydovchi yo‘l harakati qoidalariga amal qilmaslikni odatga aylantirgan, biroq jarimalarni o‘z vaqtida to‘lamagan. Oqibatda qarzdorlik yillar davomida ortib borgan va avtomobil qidiruvga berilgan.
Olib borilgan tezkor qidiruv va majburiy ijro harakatlari natijasida mazkur transport vositasi aniqlanib, 2026-yil 15-may kuni jarima maydoniga joylashtirilgan.
Mutasaddilar yo‘l harakati qoidalari inson hayotini saqlashga xizmat qiluvchi muhim mezon ekanini ta’kidlab, qoidalarga amal qilmaslik jiddiy huquqiy oqibatlarga olib kelishini eslatdi.
